Беларускі ўрад збіраецца вывесці прадпрыемствы на сусветныя біржы :: Хартыя'97 :: Навiны

Менск зрабіў нечаканую заяву пра магчымасць размяшчэння на сусветных рынках акцый беларускіх прадпрыемстваў у гэтым годзе. Пра гэта паведаміў “Інтэрфакс” са спасылкай на віцэ-прэм’ера Уладзіміра Сямашку і на Міністэрства эканомікі. Мяркуюць, што на міжнародныя фондавыя біржы, у прыватнасці, будуць выстаўленыя акцыі прадпрыемстваў нафтахімічнага комплексу, якімі ўжо даўно цікавяцца расейскія кампаніі. Бізнэс Расеі не атрымае прыярытэтнага доступу да беларускай прыватызацыі ў выпадку выканання гэтых планаў. Праўда, незалежныя эксперты ў іх рэалістычнасці сумняваюцца, піша расейская газета “Время новостей”.

Продаж акцый беларускіх прадпрыемстваў па планах урада мусіць спрыяць дасягненню прагнозных паказчыкаў развіцця эканомікі і выкананню бюджэту. Прадугледжваецца правядзенне допэмісіі акцый найбольш прывабных прадпрыемстваў, да якіх у тым ліку адносяцца нафтаперапрацоўчыя і нафтахімічныя заводы.

Але спачатку Беларусі трэба будзе атрымаць краінавы крэдытны рэйтынг. Падрыхтоўчую працу Менск не вельмі спяшаючыся вёў цягам некалькіх гадоў, і толькі пасля энергетычнага канфлікту з Расеяй, які адбыўся на пачатку гэтага года, стаў прыкладаць высілкі ў гэтым кірунку. Службоўцы цяпер заяўляюць, што краінавы крэдытны рэйтынг будзе атрыманы ў першай палове гэтага года. “Зрабіць гэта нескладана, былі б грошы і жаданне пазнаць горкую праўду пра стан нашых фінансаў”, – мяркуе кіраўнік менскага даследчага цэнтра Мізэса Яраслаў Раманчук.

Наступным этапам мусіць стаць атрыманне крэдытнага рэйтынгу беларускімі прадпрыемствамі і банкамі. Пакуль такім не валодае ні адзін суб’ект гаспадарання краіны.

“Заява пра продаж акцый на сусветных фондавых рынках дабрэйшая, бо паказвае, што ўрад па меншай меры пачаў пра гэта задумвацца, – лічыць кіраўнік даследчага цэнтра беларускага Інстытута прыватызацыі і мэнэджменту Ірына Тачыцкая. – Але яно больш як нечаканае. Каб рэалізаваць гэтую ідэю, спатрэбіцца працяглы час. Пакуль я не бачу падстаў, каб выхад на сусветныя фондавыя рынкі адбыўся ў 2007-м або на пачатку 2008 года. Дагэтуль ніводная з беларускіх кампаній не праходзіла праз неабходныя для гэтага працэдуры, а гэта каласальная праца. Трэба ўлічыць і тое, што ў Беларусі адсутнічае ўнутраны фондавы рынак”.

Яраслаў Раманчук лічыць, што нават у выпадку выхаду на сусветныя рынкі акцыі беларускіх кампаній наўрад ці будуць прывабнымі для патэнцыйных пакупнікоў: “Беларускія прадпрыемствы сёння не адпавядаюць сусветным крытэрам па празрыстасці, карпаратыўнаму кіраванню і іншым параметрам”. Ён таксама выказаў здагадку, што ўрад, які заўсёды баяўся страціць кантроль над прадпрыемствамі, не пойдзе на размяшчэнне буйных пакетаў акцый, якія былі б прывабнымі для магчымых інвестараў, “а 5–7% акцый наўрад ці кагосьці зацікавяць”.

Заявы ўрада Беларусі пра вывад прадпрыемстваў на міжнародныя біржы можна разглядаць “як дыпламатычны, палітычны ход, але не як прадуманую праграму прыцягнення сродкаў”, мяркуе спадар Раманчук. “Калі гаворка ідзе пра прыватызацыю, трэба абвясціць адкрыты конкурс, а не рабіць заявы ў піку расейскім кампаніям”, – адзначае ён.