Што ведаюць менчукі пра 25 сакавіка? :: Хартыя'97 :: Навiны

89-я ўгодкі Беларускай Народнай Рэспублікі альбо Дзень Волі 25 сакавіка, дэмакратычная грамадзкасьць краіны заклікае адзначыць на Кастрычніцкай плошчы Менску, якую пасьля леташніх акцыяў пратэсту называюць плошчай Кастуся Каліноўскага. Што ведаюць менчукі пра дзень 25 сакавіка? Гэтым пытаньнем у мінакоў на Кастрычніцкай плошчы цікавілася карэспандэнт “Радыё Свабода”.

Юнак: “Дзень Волі, дзень Незалежнасьці. Дзень, калі была абвешчана Беларуская Народная Рэспубліка”.

Юначка: “Дзень гуканьня вясны. Мы 25 едзем гукаць вясну і для нас сёлета гэта дзень гуканьня вясны”.

Спадарыня: “25 сакавіка? Не, ня ведаю. Можа Дзень Канстытуцыі?”

Спадар: “Не, я ніколі ня чуў і нічога ня ведаю. Можа ўзгадаю пасьля, але зараз пакуль не”.

Юначка: “Гэта дзень незалежнасьці нашай краіны. Я гэтым вельмі ганаруся. Мы ведаем пра падзеі, якія будуць 25 сакавіка, і мы ўсё гэта падтрымліваем”.

Спадарыня: “Чула што гэта за дзень, але забылася. Нават на мітынгі хадзіла. Але пачакайце, зараз узгадаю... Дзень незалежнасьці... Здаецца, утварэньне рэспублікі БНР...Так, так, БНР”.

Спадар: “Дзень БНР, Беларускай Народнай Рэспублікі. Яна была абвешчана ў 1919 годзе”.

Спадарыня: “Папраўдзе сказаць, цяжка прыгадаць, што гэта за дзень такі, якая падзея зьвязаная з 25 сакавіка. Прабачце, калі ласка. Можа пасьля і ўзгадаю, але цяпер не магу сказаць”.

Юнак: “Для мяне гэта вялікае сьвята, сьвята незалежнасьці Беларусі. Увогуле – сьвяты дзень, калі Беларусь, нарэшце дамаглася сваёй незалежнасьці. Шкада толькі, што гэта не зьяўляецца зараз дзяржаўным сьвятам. Але я спадзяюся, што праз некаторы час мы здолеем вярнуць гэты дзень у сьвяточны каляндар кожнага беларуса”.