«Газпром» не хоча купляць у Менска стратны «Белтрансгаз» :: Хартыя'97 :: Навiны

Расейская манаполія не можа заключыць дамову куплі-продажу пакета акцый беларускага “Белтрансгаза”, тэрмін падпісання якога мінае 1 чэрвеня. Пра гэта піша газета "Коммерсант".

Урад Беларусі мае намер знізіць кошт газу на ўнутраным рынку краіны з 160 да 140 даляраў за тысячу кубаметраў. Для гэтага Менск гатовы адмяніць нацэнку ў памеры 18 даляраў за тысячу кубаметраў за паслугі “Белтрансгаза” для мясцовых спажыўцоў, зрабіўшы газатранспартную сістэму краіны стратнай.

Першы намеснік прэм’ер-міністра Беларусі Уладзімір Сямашка заявіў 13 сакавіка, што Менск гатовы захаваць нацэнку “Белтрансгаза”, як таго патрабуе расейскі бок, але толькі пасля 1 студзеня 2011 года, калі 50 адсоткамі акцый кампаніі будзе валодаць “Газпром”. Такім чынам, улады Беларусі плануюць у 2007–2010 гады адмяніць нацэнку, што дазволіць знізіць цану для прамысловых спажыўцоў краіны.

Менск таксама агучыў яшчэ адну ўмову для захавання нацэнкі: расейскі бок павінен забяспечыць поўную загрузку беларускай газатранспартнай сістэмы. Сёння яна загружаная на 50 адсоткаў. Крыніца “Коммерсанта” ў газавай манаполіі растлумачыла, што “ацэнка “Белтрансгаза” не прадугледжвала абавязальніцтваў “Газпрома” па запаўненні газатранспартнай сістэмы “Белтрансгаза” на 100 адсоткаў. Акрамя таго, “Газпром” патрабуе рэгістрацыі дамовы ў Маскве ў рамках расейскага заканадаўства, аднак Сямашка патрабуе рэгістрацыі дамовы ў Беларусі.

“Газпром” збіраецца набыць палову акцый “Белтрансгаза” за кошт платы за расейскае паліва. Дзеянні Менска накіраваныя найперш на кампенсаванне росту ўнутраных цэнаў на паліва пасля падвышэння цэнаў на яго Расеяй.