Амбасадар Бэнет: «Мы дапаможам Беларусі ў руху ў бок дэмакратыі» :: Хартыя'97 :: Навiны

Цяперашняя палітыка Вялікабрытаніі ў дачыненні Беларусі складаецца з таго, каб стымуляваць беларускі ўрад выконваць свае абавязальніцтвы ў рамках АБСЕ, а таксама іншыя дамоўленасці. Пра гэта ў інтэрв’ю БелаПАН заявіў амбасадар Вялікабрытаніі ў Беларусі Браян Бэнет.

Паводле яго слоў, у гэтым годзе Вялікабрытанія будзе па-ранейшаму “спрабаваць дапамагаць Беларусі ў яе руху ў бок дэмакратыі”, а таксама ў будаванні дзяржавы, у якой належным чынам захоўваюцца правы чалавека: на ўдзел у справядлівых і сумленных выбарах, свабоду сходаў, выяўлення меркаванняў і г.д.

“Ваш урад гаворыць нам пра тое, што Беларусь – вельмі маладая краіна, і ёй неабходна больш часу, каб пайсці па гэтым шляху, – адзначыў брытанскі дыпламат. – Аднак, на нашу думку, сам кірунак, у якім рухаецца Беларусь, сыходзіць у бок ад дэмакратыі. Закрываюцца газеты, няўрадавыя арганізацыі падвяргаюцца пераследу, а людзей кідаюць за краты толькі за тое, што яны выказваюць свае думкі. Мы не лічым, што гэта прыкметы прагрэсу”.

“Мы ў чаканні развіцця падзей у Беларусі і будзем гатовыя дапамагчы краіне ў той момант, калі беларускі ўрад заявіць пра свой намер рухацца ў гэтым кірунку, – падкрэсліў Б.Бэнет. – Беларусь мяжуе з краінамі, якія ўжо ідуць да шляху дэмакратычнага працэсу. Яны, а таксама такія краіны, як наша, з багатымі традыцыямі дэмакратычнай судовай улады, свабоды прэсы і супрацоўніцтва з апазіцыяй, гатовыя дапамагчы Беларусі, каб прасунуцца ў гэтым кірунку”.