Творы апазіцыйных пісьменнікаў могуць выключыць з школьных праграм :: Хартыя'97 :: Навiны

Начальнік галоўнага ідэалагічнага кіравання Адміністрацыі прэзідэнта лічыць неабходным перарабіць школьныя праграмы па беларускай літаратуры. Азнаёміўшыся з школьнымі праграмамі па дадзеным прадмеце, Алег Пралескоўскі прапанаваў “мінімізаваць выкарыстанне твораў апазіцыйна настроеных пісьменнікаў”.

Начальнік галоўнага ідэалагічнага кіравання Адміністрацыі прэзідэнта даручыў у школьных праграмах “усюды, дзе выкарыстанне твораў Н.Гілевіча, Р.Барадуліна, Г.Бураўкіна і іншых не выкліканае крайняй неабходнасцю характарыстыкі іх творчасці як прадстаўнікоў літаратуры другой паловы ХХ стагоддзя, замяніць іх творы на сачыненні іншых пісьменнікаў і паэтаў”, паведамляе “Тэлеграф”.

“Гранічна мінімізаваць змест манаграфічных тэм, прысвечаных творчасці Н.Гілевіча, Г.Барадуліна (да двух–трох вершаў) і іншых, выключыць траплянне ў навучальныя праграмы твораў нацыяналістычнага, палітызаванага характару”, – прыводзіць АФН фрагменты даручэння Алега Пралескоўскага.

Прадстаўнік Адміністрацыі прэзідэнта таксама прапаноўвае “выключыць з спісаў літаратуры для вывучэння і пазакласнага чытання творы С.Алексяевіч, С.Законнікава, В.Іпатавай, У.Арлова, М.Скоблы, В.Чаропкі і іншых апазіцыйна настроеных пісьменнікаў “сярэдняй рукі”.

Алег Пралескоўскі рэкамендуе таксама пры вывучэнні творчасці Васіля Быкава ў школе прапанаваць для абавязковага чытання аповесць “Сотнікаў” замест “Аблавы”, а пры вывучэнні творчасці Янкі Купалы выключыць п’есу “Тутэйшыя”, замяніўшы яе вершамі і паэмамі дадзенага аўтара.

Начальнік галоўнага ідэалагічнага кіравання Адміністрацыі прэзідэнта таксама даручыў перафармуляваць назву і змест пятага раздзелу “Літаратура нацыянальнага адраджэння” ў праграме для ХІ класа на “Літаратура другой паловы XIX –пачатку XX стагоддзя”.