«Захапляльная падзея» Уты Цапф :: Хартыя'97 :: Навiны

Семінар “Вывучэнне магчымасцяў Беларусі ў рамках Еўрапейскай стратэгіі суседства” адбудзецца 15 сакавіка пад старшынствам віцэ-спікера ніжняй палаты нелегітымнага беларускага “парламента” Сяргея Забалотца і кіраўніка Працоўнай групы ПА АБСЕ па Беларусі Уты Цапф. Удзел у семінары мусяць узяць дэпутаты “палаткі”, службоўцы Міністэрства замежных спраў, заяўленыя парламентары Польшчы, Украіны, прадстаўнікі Еўракамісіі, а таксама “старанна адабраныя” грамадскія дзеячы. Дарэчы, як вынікае з праграмы, апошнім на семінары нават не даецца слова. Гэтае дзіўнае мерапрыемства Ута Цапф з энтузіязмам назвала “вельмі захапляльнай падзеяй”, якая азначае “пачатак дыялогу паміж усімі грамадскімі сіламі ў Беларусі і еўрапейцамі”. Пракаментаваць чарговыя, не зусім зразумелыя ініцыятывы Цапф прэс-цэнтр Хартыі’97 папрасіў былога намесніка міністра замежных спраў Беларусі, міжнароднага каардынатара Хартыі’97 Андрэя Саннікава.

– Семінар “Вывучэнне магчымасцяў Беларусі ў рамках Еўрапейскай стратэгіі суседства”, у тым фармаце, у якім ён падрыхтаваны кіраўнікамі Працоўнай групы ПА АБСЕ па Беларусі Утай Цапф і прадстаўнікамі ўлад, не мае нічога агульнага з імкненнем дэмакратычных сілаў Беларусі і еўрапейскіх палітыкаў дамагчыся змены сітуацыі ў краіне. Спадарыня Цапф назвала “поспехам” ужо сам факт правядзення гэтага семінара, цалкам забыўшыся пра тое, што па ніводнай з умоў, высунутых Еўразвязам, рэжым Лукашэнкі не зрабіў ніякіх, хай нават дробных, крокаў. Сам семінар рыхтаваўся ўпотай ад дэмакратычных сілаў Беларусі, яго фармат узгадняўся толькі з прадстаўнікамі ўлад, а прадстаўнікоў апазіцыі, удзел якіх таксама ўзгоднены з уладамі, проста паставілі перад фактам, прапанаваўшы ім сваёй прысутнасцю падтрымаць прапагандысцкае мерапрыемства. Кіраўніцы Працоўнай групы ПА АБСЕ добра вядома сітуацыя ў Беларусі, яна выдатна ведае, што пасля таго, як пры яе падтрымцы дэлегацыі “палаткі” падалі статус у ПА АБСЕ, змены ў Беларусі адбыліся толькі ў горшы бок. Расце колькасць палітвязняў, практычна знішчаны незалежны друк, парушаюцца грамадзянскія і палітычныя правы, робіцца ціск на партыі, прафсаюзы, грамадскія арганізацыі, усё больш адміністрацыйных абмежаванняў уводзіцца ў эканоміцы.

У той самы час сённяшняя сітуацыя ў сувязі з неабходнасцю забеспячэння эканамічнай і энергетычнай бяспекі незалежнай Беларусі дазваляе па-новаму паглядзець на магчымасці дэмакратычнай краіны. Менавіта таму дэмакратычныя сілы абмяркоўваюць сёння магчымасці дыялогу з уладай для захавання незалежнасці і дэмакратызацыі палітычнай сістэмы ў Беларусі. Толькі пасля сур’ёзнага абмеркавання перспектыў развіцця ў Беларусі можна стаць адказным партнёрам Еўропы ў перамовах па ўсім спектры пытанняў.

Спадарыня Цапф прапаноўвае цалкам іншую стратэгію, якая не мае нічога агульнага з магчымым дыялогам паміж уладай і апазіцыяй. Гэты запланаваны на заўтра семінар служыць умацаванню рэпрэсіўнага рэжыму, а не дэмакратызацыі Беларусі. Як магчыма ўвогуле праводзіць такія мерапрыемствы, калі ў турмах Беларусі знаходзяцца палітвязні, калі напярэдадні прыезду Уты Цапф улады дэманстратыўна арыштоўваюць Вячорку і Сіўчыка, калі працягваюцца рэпрэсіі супраць беларускай моладзі. Калі сябры Працоўнай групы ПА АБСЕ сапраўды зацікаўленыя ў дэмакратычным развіцці Беларусі, можна ім прапанаваць прыехаць у Менск 25 сакавіка для таго, каб вызначыць не прапагандысцкую, а рэальную гатоўнасць улад да дэмакратычных ператварэнняў.