Ці варта было ісьці ў бібліятэку? :: Хартыя'97 :: Навiны

Сёньня ў Менску адбыўся міжнародны сэмінар “Вывучэньне магчымасьцяў Беларусі ў рамках эўрапейскай стратэгіі суседзтва”. Ён праходзіў у Нацыянальнай бібліятэцы Беларусі пад старшынёўствам кіраўніцы Рабочай групы Парлямэнцкай Асамблеі АБСЭ дэпутаткі Бундэстагу Уты Цапф і намесьніка кіраўніка “палаты прадстаўнікоў” Сяргея Забалотца.

У перапынку сэмінару карэспандэнт “Радыё Свабода” запытаў пра стаўленьне спадарыні Цапф да выказваньняў некаторых апазыцыйных палітыкаў, якія лічаць, што сэмінар ня варта было праводзіць. Бо амаль за тры гады, што мінулі з моманту адпаведнай дамовы, беларускія ўлады не зрабілі ніякіх крокаў у бок дэмакратызацыі. Прынамсі, дагэтуль ня зьменены Выбарчы кодэкс.

Кіраўніца рабочай групы ў справах Беларусі адказала, што яна разумее складанасьць сытуацыі, але ўпэўненая, што памылкі тут няма:

“Я лічу сэмінар неабходным, таму што ў дачыненьнях паміж краінамі й арганізацыямі ня ўсё адбываецца адразу. Трэба рухацца наперад, крок за крокам. Кожная дзяржава мае свой час для разьвязаньня сваіх пытаньняў – прынамсі, Выбарчага кодэксу. Я спадзяюся, што мы яшчэ вернемся да гэтай праблемы пазьней.

З другога боку, нават калі б выбарчае заканадаўства не зьмянілася, але выконвалася ў поўным аб’ёме, дык і гэта было б вялікім прагрэсам у заканадаўчай сыстэме Беларусі й дапамагло б зрабіць працэс больш празрыстым і справядлівым. І вынік быў бы лепшы”.

Удзельнік сэмінару дэпутат “савету рэспублікі” Анатоль Малафееў лічыць, што сёньня тэма дачыненьняў Беларусі й Эўразьвязу робіцца значна больш актуальнай, чым раней:

“Я лічу, што першы разумны і прадуманы крок Эўразьвязу – знайсьці сёньня рашэньні, якія дазвалялі б Беларусі хутчэй ды актыўней уключацца ў палітыку суседзтва Эўразьвязу”, -- заявіў ён.

На сэмінар запрошаныя некаторыя прадстаўнікі дэмакратычнай грамадзкасьці: былы спікер “савету рэспублікі” Аляксандар Вайтовіч, былы дэпутат “палаты прадстаўнікоў” Валеры Фралоў, старшыня Беларускага Хельсінкскага камітэту Таццяна Процька, старшыня Беларускай асацыяцыі журналістаў Жана Літвіна, эканаміст Леанід Заіка, сацыёлаг, прафэсар Алег Манаеў, старшыня Беларускага кангрэса дэмакратычных прафсаюзаў Аляксандр Ярашук.

Некаторыя з тых, каго запрасілі, адмовіліся ад удзелу ў ім. Вядомы беларускі палітык, былы палітвязень Міхаіл Марыніч, які адмовіўся браць удзел у семінару, так растлумачыў прэс-цэнтру Хартыі’97 сваю пазыцыю:

“Сёньня, калі ўлада працягвае трымаць у турмах палітычных зьняволеных – Аляксандра Казуліна, Зьмітра Дашкевіча, Мікалая Статкевіча, Паўла Севярынца і іншых нашых сяброў, калі моладзевых актывістаў перасьледуюць за іх грамадзянскую пазыцыю, калі напярэдадні візіту Уты Цапф затрымліваюць лідэраў апазіцыйных партый, нельга ўдзельнічаць у такіх сумнеўных мерапрыемствах. Як былы палітвязень я вельмі добра ведаю, наколькі патрэбная сёння ўсім, хто ў турмах, наша салідарнасьць і прынцыповасць”, – заявіў Міхась Марыніч.

Паводле слоў палітыка, ён расчараваны арганізацыяй семінара. “Я вельмі расчараваны тым, што арганізатары семінара – Парламенцкая асамблея АБСЕ – ужылі дыскрымінацыйны прынцып да прадстаўнікоў дэмакратычнай апазіцыі. Ніводны апазіцыянер у спісы выступоўцаў не патрапіў. Што гэта за пазіцыя паважаных міжнародных арганізацый? Для якіх мэт нас туды запрасілі? Паказаць “карцінку” на тэлебачанні пра тое, што ў семінары бяруць удзел і дэмакратычныя сілы? Мы не можам згадзіцца з такой пазіцыяй”, -- сказаў Марыніч.

У залі Нацыянальнай бібліятэкі, дзе праходзіў сэмінар

Фота "Радыё Свабода"