Міхаіл Марыніч: «Патрэбная салідарнасць і прынцыповасць» :: Хартыя'97 :: Навiны

Былы міністр знешнеэканамічных сувязяў Беларусі, дэпутат Вярхоўнага Савета 12 склікання, Надзвычайны і Паўнамоцны амбасадар Рэспублікі Беларусь Міхаіл Марыніч адмовіўся браць удзел у семінару “Вывучэнне магчымасцяў Беларусі ў рамках Еўрапейскай стратэгіі суседства”, які адбудзецца 15 сакавіка пад старшынствам віцэ-спікера ніжняй палаты нелегітымнага беларускага “парламента” Сяргея Забалотца і кіраўніцы Працоўнай групы ПА АБСЕ па Беларусі Уты Цапф. Сваю пазіцыю вядомы і паважаны палітык растлумачыў прэс-цэнтру Хартыі’97 наступным чынам: “Сёння, калі ўлада працягвае трымаць у турмах палітычных зняволеных – Аляксандра Казуліна, Змітра Дашкевіча, Мікалая Статкевіча, Паўла Севярынца і іншых нашых сяброў, калі моладзевых актывістаў пераследуюць за іх грамадзянскую пазіцыю, калі напярэдадні візіту Уты Цапф затрымліваюць лідэраў апазіцыйных партый, нельга ўдзельнічаць у такіх сумнеўных мерапрыемствах. Як былы палітвязень я вельмі добра ведаю, наколькі патрэбная сёння ўсім, хто ў турмах, наша салідарнасць і прынцыповасць”, – заявіў Міхась Марыніч.

Паводле слоў палітыка, ён расчараваны арганізацыяй семінара. “Я вельмі расчараваны тым, што арганізатары семінара – Парламенцкая асамблея АБСЕ – ужылі дыскрымінацыйны прынцып да прадстаўнікоў дэмакратычнай апазіцыі. Ніводны апазіцыянер у спісы выступоўцаў не патрапіў і быў пазбаўлены слова. Што гэта за пазіцыя паважаных міжнародных арганізацый? Для якіх мэт нас туды запрасілі? Паказаць “карцінку” на тэлебачанні пра тое, што ў семінары бяруць удзел і дэмакратычныя сілы? Мы не можам згадзіцца з такой пазіцыяй, і таму я адмовіўся ўдзельнічаць у семінары Уты Цапф. Мы можам удзельнічаць у такіх мерапрыемствах толькі як раўнапраўныя суб’екты, на роўных умовах”, – перакананы былы міністр і дыпламат.