Забалоцец: «Беларусь – прадказальны і надзейны партнёр Еўразвяза» :: Хартыя'97 :: Навiны

Намеснік старшыні так званай палаты прадстаўнікоў Сяргей Забалоцец заявіў на семінары з прадстаўнікамі АБСЕ, што Беларусь – “прадказальны і надзейны сусед Еўрапейскага Звяза”. Пры гэтым “палатачнік” адзначыў, што “ў ЕЗ існуе адарваныя ад рэчаіснасці стэрэатыпы пра Беларусь”.

“Усялякія санкцыі і абмежаванні з’яўляюцца крокам назад, у той час як рух наперад магчымы толькі шляхам дыялогу і пошуку кампрамісу... неабходны пошук не толькі кропак сутыкнення, а мы павінны разглядаць пэўныя кірункі супрацоўніцтва”, – заявіў падчас выступу на семінары ў нацыянальнай бібліятэцы Сяргей Забалоцец, паведамляе “Інтэрфакс”.

Таксама Забалоцец паведаміў еўрапейскім палітыкам, што “ў доўгатэрміновай перспектыве інтарэсы Беларусі непарыўна звязаныя з фармаваннем адзінай Еўропы”.

“Мы, магчыма, не прыйдзем сёння да згоды па ўсіх пытаннях, але беларускія “парламентарыі” маюць намер працягнуць шукаць шляхі дыялогу з еўрапейскімі калегамі”, – запэўніў Сяргей Забалоцец

Кіраўніца еўрапейскай дэлегацыі Ута Цапф адзначыла у сваю чаргу, што “мэтай Еўразвяза з’яўляецца развіццё добрасуседскіх стасункаў з Беларуссю”. “Еўразвяз не хоча ізаляцыі Беларусі і будзе спрабаваць уступіць у дыялог, каб павысіліся ўмовы жыцця народа Беларусі”, – паабяцала Ута Цапф беларускім службоўцам.

Пры гэтым яна адзначыла, што “Еўропа не зацікаўленая ва ўмяшанні ў стасункі Беларусі і Расеі”. “Мы хочам пабудаваць уласныя стасункі з Расеяй і ўласныя стасункі з Беларуссю”, – заявіла Ута Цапф, паведамляе БелТА.

Кіраўніца еўрапейскай дэлегацыі яшчэ раз нагадала, што ўмовай пачатку дыялогу ЕЗ з уладамі Беларусі застаецца выкананне патрабавання Еўразвяза: “справядлівыя свабодныя выбары, доступ да СМІ, свабода стварэння прафсаюзаў і іншых асацыяцый, якія маглі б працаваць для развіцця грамадства, празрыстая сістэма працы судоў, забеспячэнне вяршэнства закона”, – нагадала Ута Цапф.