Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Камісарка ЕЗ заклікала вызваліць усіх беларускіх палітвязняў 10:05, 15/03/2007
Еўракамісарка па знешніх сувязях і палітыцы добрасуседства Беніта Ферэра-Вальднер выказала занепакоенасць з нагоды затрымання ўвечары 13 сакавіка ў Менску лідэра Партыі БНФ Вінцука Вячоркі і грамадскага актывіста Вячаслава Сіўчыка. У афіцыйнай заяве еўракамісаркі падкрэсліваецца, што В.Вячорка і В.Сіўчык і раней падвяргаліся “шматлікім арыштам за выказванне свайго палітычнага меркавання”. Б.Ферэра-Вальднер заклікала беларускія ўлады неадкладна вызваліць усіх, хто “ўтрымоўваецца пад вартай па палітычных матывах”.
Еўракамісарка таксама нагадала, што для пачатку ўсебаковага супрацоўніцтва ЕЗ і Беларусі ў рамках Еўрапейскай палітыкі добрасуседства “з боку Беларусі павінны быць зробленыя пэўныя крокі ў бок дэмакратызацыі і павагі правоў чалавека, у тым ліку неад’емнае права народа Беларусі на свабоду ўласнага меркавання”.
В.Вячорка і В.Сіўчык 14 сакавіка былі вызваленыя з спецпрыёмніка-размеркавальніка ГУУС Менгарвыканкама на вуліцы Акрэсціна, аднак 23 сакавіка яны мусяць з’явіцца ў суд. З прычыны адсутнасці законных падстаў для затрымання палітыкаў абвінавацілі ў здзяйсненні “дробнага хуліганства” – нібыта яны нецэнзурна выказваліся ў грамадскім месцы.
