Тыдзень салідарнасьці з Беларусьсю напярэдадні 25 сакавіка (Фота) :: Хартыя'97 :: Навiны

Сёньня ў Польшчы і Эўропе пачынаецца “гарачы тыдзень беларускіх падзеяў” – культурных і палітычных, прымеркаваных да гадавіны прэзідэнцкіх выбараў у Беларусі і Дня Волі 25 сакавіка. Кульмінацыяй тыдня салідарнасьці з Беларусьсю стане вялізны канцэрт “Салідарныя зь Беларусьсю”, які пройдзе 25 сакавіка, на Замкавым пляцы ў Варшаве.

Беларускі тыдзень пачнецца ад шэрагу культурніцкіх падзеяў – сёньняшняга канцэрту Аляксандра Памідорава ў Варшаве. У нядзелю адбудуцца паказы дакумэнтальных фільмаў зь Беларусі і польскіх пра Беларусь – “Плошча” Юрыя Хашчавацкага, “Урок беларускай” Мірэка Дэмбіньскага, сустрэчы з рэжысэрамі, выставы здымкаў зь Беларусі.

У начы зь нядзелі на панядзелак у Польшчы і іншых эўрапейскіх краінах з ініцыятывы Маладых эўрапейскіх кансэрватараў адбудзецца акцыя “Дай голас беларусам”. Яе ўдзельнікі зь 30 гарадоў Эўропы завяжуць вусны помнікам, што стаяць у іхных гарадах, і павесяць на іх плякаты з патрабаваньнем свабоды слова ў Беларусі.

Вядомыя музыкі зь Беларусі і Польшчы выступяць 25 сакавіка – у беларускі Дзень Волі – у гістарычным цэнтры Варшавы.

“Там выступяць зоркі польскай музыкі, і гэта будзе канцэрт у рытме “рэгі” – музыкі міру. Мы ня хочам, каб гэта быў сумны канцэрт, ня хочам гаварыць пра тое, як дрэнна, але пра тое, як можа быць добра”, -- заявіў “Радыё Свабода” адзін з арганізатараў канцэрту Куба Міхалоўскі.

25 сакавіка, у 12.00 на плошчы Каліноўскага ў Менску адбудзецца сьвяткаваньне Дня Волі.

Акцыя, падобная да заплянаванай летась, адбылася ў гарадох Эўропы год таму (надпісы па-фінску і па-швэдзку на помніку ў Хэльсынках: “Дайце голас народу Беларусі”)

Тая ж акцыя ў Брусэлі...

...і ў Падуі