«Свабодны тэатр» выступіў у Брусэлі (Фота) :: Хартыя'97 :: Навiны

15 сакавіка, напярэдадні Дня беларускай салідарнасці, у Брусэлі адбыліся мерапрыемствы, асноўнай тэмай якіх сталі сакавіцкія падзеі, якія адбываліся ў цэнтры беларускай сталіцы роўна год таму. Выстава беларускіх фотарэпарцёраў і спектаклі “Свабоднага тэатра” далі старт кампаніі салідарнасці, якая працягнецца да 25 сакавіка.

На мерапрыемствы сабраліся прадстаўнікі розных палітычных і тэатральных еўрапейскіх структур, грамадскія дзеячы, прадстаўнікі беларускай дыяспары ў Бельгіі.

Галоўнай падзеяй сталі паказы двух спектакляў “Свабоднага тэатра” – “Пакаленне Jeans” і “Быць Гаральдам Пінтэрам”. “Свабодны тэатр” практычна кожны месяц адзначае Дзень беларускай салідарнасці паказамі сваіх спектакляў, прымяркоўваючы свае гастролі і паказы ў Менску да 16 дня кожнага месяца. Так было падчас гастроляў у парыжскім Theatre-Studio, Шведскім Каралеўскім тэатры, тэатры Сэнт-Эцьена.

Мастацкі кіраўнік тэатра Мікалай Халезін пракаментаваў прэс-цэнтру Хартыі’97 выступ у Брусэлі:

«Мы заўсёды імкнёмся сумясціць нашы гастролі з датай, якая стала найважнейшай для беларусаў у апошнія гады. І мы рады, што ўсё больш культурных ініцыятыў і калектываў уключаюцца ў працэс падтрымкі Беларусі. Але гэта не значыць, што наша мэта – праца за межамі краіны. Гэты тыдзень мы пачалі з паказаў спектакляў у Брусэлі, працягнем у Менску, а 23–24 сакавіка выступім у Маскве, дзе нам падаў свае сцэнічныя пляцоўкі тэатральны Цэнтр ім. Меярхольда”.

24 сакавіка акцыі ў Брусэлі працягнуцца паказам дакументальнага фільма Юрыя Хашчавацкага “Плошча” і канцэртам славацкай спявачкі Пятры Джордан

Арганізатарам мерапрыемстваў выступіў брусэльскі офіс арганізацыі “За дэмакратычную Беларусь”, які ўзначальвае Вольга Стужынская.

Сцэна з спектакля “Пакаленне Jeans”

Сцэна з спектакля “Быць Гаральдам Пінтэрам”

Выстава беларускіх фотарэпарцёраў