У офісе «Бацькаўшчыны» адбыўся ператрус :: Хартыя'97 :: Навiны

Ператрус ў памяшканні, дзе знаходзіліся кнігі і частка маёмасці міжнароднага грамадскага аб’яднання “Згуртаванне беларусаў свету “Бацькаўшчына”, які адбыўся 16 сакавіка, скончыўся канфіскацыяй некаторых выданняў.

Па словах старшыні рады “Бацькаўшчыны” Алены Макаўской, людзі, што прыйшлі з ператрусам у кватэру, дзе захоўвалася частка кніг, “не назваліся, не паказалі ордэраў на ператрус і ўвогуле не прад’явілі ніякіх паўнамоцтваў”. “Адзіны, хто паказаў пасведчанне, – участковы, які прыйшоў з гэтымі людзьмі. Па яго словах, ад суседзяў паступіла інфармацыя, што ў нас парушаюцца агульнапрынятыя нормы ўтрымання жылых памяшканняў. Потым у правяраючых узнік падазрон, што ў гэтым памяшканні знаходзіцца офіс”, – паведаміла А.Макаўская БелаПАН.

Паводле яе інфармацыі, асобы, якія праводзілі ператрус, канфіскавалі блізу тысячы асобнікаў кніг гістарычнага зместу, у тым ліку аўтарства Юрыя Віцьбіча і Юрыя Туранка – вядомых дзеячаў беларускай эміграцыі. “Мы падумаем, ці абскардзіць канфіскацыю змешчаных у нас на захоўванні кніг, пасля нарады з юрыстамі. Роўна як і шматлікія парушэнні пры правядзенні ператрусу”, – паведаміла А.Макаўская.

Яна падкрэсліла, што памяшканне, у якім адбыўся ператрус, не з’яўляецца офісам арганізацыі.