У Магілёве, Бабруйску, Полацку, Салігорску, Навалукомлі, Дзяржынску адзначылі Дзень салідарнасьці (Фота) :: Хартыя'97 :: Навiны

У многіх гарадах Беларусі 16 сакавіка адзначылі традыцыйны Дзень беларускай салідарнасьці. Людзі выходзілі на плошчы сваіх гарадоў з партрэтамі палітвязьняў і запальвалі свечкі.

У Магілёве Дзень салідарнасьці адзначылі запальваньнем традыцыйных сьвечак памяці. Актывісты моладзевых арганізацыяў з запаленымі сьвечкамі прайшлі цэнтральнымі вуліцамі гораду. На завяршэньне ўдзельнікі акцыі прыйшлі да будынку Магілёўскага гарвыканкаму.

У Бабруйску актывісты сацыял-дэмакратычнай партыі (Грамада) правялі акцыю на традыцыйным для Дня салідарнасьці месцы – капліцы перад Менскімі могілкамі. Прыблізна праз гадзіну пад’ехалі міліцыянты, якія вымусілі актывістаў спыніць акцыю.

І ў Магілёве і Бабруйску сакавіцкі Дзень салідарнасьці абышоўся без затрыманьняў.

Полацкія “маладафронтаўцы” таксама зладзілі акцыю салідарнасьці з палітвязьнямі. А 20-й гадзіне яны сталі з запаленымі сьвечкамі ў руках ля помніка Францішку Скарыне. Агулам у акцыі бралі ўдзел восем чалавек і доўжылася яна 15 хвілін. Паводле арганізатараў, міліцыі ля помніка не было, і гэта ўратавала іх ад затрыманьняў.

У Новалукомлi ў некалькiх месцах прайшла акцыя Салiдарнасцi з сем`ямi зьнiклых i палiтвязьнямi, у якой прымала ўдзел 20 чалавек -- актывiсты кампаніі "За Свабоду" i "Маладога Фронту".

16 сакавіка, як і месяц таму, улады вырашылі разагнаць акцыю ў Салігорску. Адмыслова для гэтага на дапамогу мясцовай міліцыі ў Салігорск прыбылі байцы спэцназу і аўтазак. Але, як паведамлялася раней, у сувязі з набліжаючымся Днём Волі 25 сакавіка, было прынята прынцыповае рашэньне пра зьмену фармату акцыі Салідарнасьці 16-га сакавіка ў Салігорску. Каб выключыць арышты актывістаў напярэдадні Дня Волі было вырашына замест выхаду на плошчу запаліць сьвечы Салідарнасьці ля будынка гарадзкога Суда.

- Мы прадбачылі прыезд спэцназу, аднак ня выйшлі гэтым разам на плошчу выключна з-за набліжаючагася сьвяткаваньня Дня Волі ў Менску 25 сакавік. Многіх маглі папросту пасадзіць на "суткі" да 25-га, як гэта ўжо было не аднойчы ў Салігорску. Таму, карыстаючыся момантам, яшчэ раз заклікаю ўсіх, хто любіць нашую родную Беларусь, прыйсьці на пляц Каліноўскага (Кастрычніцкая плошча) у Менску а 12-й гадзіне 25 сакавіка, каб разам адзначыць найважнейшае беларускае сьвята - Дзень Волі, - пракамэнтаваў зьмену фармату акцыі моладзевы актывіст Алесь Міхалок.

Навалукомль

Дзяржынск

Полацк