Беларусы і чэхі прадставілі падпольныя спектаклі ў Менску :: Хартыя'97 :: Навiны

Сумесны паказ спектакляў беларускага “Свабоднага тэатра” і чэшскага лялечнага тэатра “Самыя любімыя медзведзяняты” адбыўся пад Менскам 18 сакавіка.

Як паведаміў БелаПАН перад паказам адзін з кіраўнікоў “Свабоднага тэатра” Мікалай Халезін, беларускі калектыў пазнаёміўся з чэшскім тэатрам на адным з міжнародных фэстаў. Чэшскія акцёры выказалі жаданне сыграць у Беларусі “падпольны спектакль”.

“Сённяшні вечар мы вырашылі назваць першым беларускім фэстам падпольных тэатраў, – пажартаваў М.Халезін. – Вядома, гэта яшчэ не фэст, але першы крок у гэты бок”.

Чэшскі тэатр прадставіў гледачам лялечны спектакль пад назовам “Кашпарэк, жандар калачаўскі” (Кашпарэк – аналаг расейскага Пятрушкі). Гэты спектакль, па словах М.Халезіна, быў паказаны ўжо ў васьмі краінах.

“Свабодны тэатр” прадставіў гледачам пастаноўку “Тэхніка дыхання ў беспаветранай прасторы”. Па словах удзельнікаў тэатра, для калектыву гэтая знакавая падзея. Прэм’ера спектакля павінна была прайсці паўтара гады таму ў адным з менскіх клубаў, але ў апошні момант тэатру адмовілі ў памяшканні. У выніку прэм’ера адбылася на прыватнай кватэры.

“Свабодны тэатр” створаны групай аднадумцаў – прафесійных акцёраў, рэжысёраў, драматургаў. Цяпер у калектыве каля 15 чалавек, а ў рэпертуары – шэсць спектакляў, з якімі “Свабодны тэатр” актыўна гастралюе за мяжой. У Беларусі тэатр не мае ні сцэны, ні памяшкання для рэпетыцый, ні фінансавання, адзначыў М.Халезін.