Працаўнікам менскага «Тэрмапласту» не хапае на квартплату :: Хартыя'97 :: Навiны

Сёння, 19 сакавіка, з двух неафіцыйных крыніц паступіла інфармацыя пра тое, што працаўнікі РУП “Менскі завод “Тэрмапласт” напачатку працоўнага дня наладзілі страйк. Ля ўвахода сабраліся 50–60 працаўнікоў прадпрыемства і патрабавалі падвышэння заробнай платы, бо шматлікія працаўнікі прадпрыемства ўжо не ў стане аплачваць квартплату.

Прадстаўнік кіраўніцтва прадпрыемства паспрабаваў нешта растлумачыць сваім падпарадкаваным, але ў выніку зразумеў, што слухаць яго ніхто не будзе, і сышоў у кабінет, паведамляе АФН.

Між іншым, атрымаць афіцыйнае пацверджанне таго, што адбылося, з боку кіраўніцтва прадпрыемства не атрымоўваецца. Прыёмная завода ператварылася ў прыёмную сакрэтнага вайсковага аб’екта. На пытанне “Што ў вас адбываецца?”, адказваюць, што ў іх “усё нармальна”, пасля просьбы “Звяжыце з кім-небудзь з кіраўніцтва” – сувязь чамусьці абрываецца.

Варта адзначыць, што РУП “Менскі завод “Тэрмапласт”, які вырабляе ТНП з пластмасы, ніколі не славіўся стабільнасцю эканамічнай сітуацыі. Аднак сённяшні міні-бунт працоўных варта разглядаць як трывожны званочак, што з эканомікай у “краіне для народа” неяк не ўсё добра. Ужо сталі звыклымі паведамленні пра тое, што на тым або іншым дзяржаўным або паўдзяржаўным прадпрыемстве больш не выплачваюць прэміі, за кошт якіх насамрэч і забяспечваўся сярэдні паказчык у 300 USD па краіне. А на “голыя” аклады паводле “клапатлівай” тарыфнай сетцы пражыць сёння будзе няпроста. Напрыклад, стаўка метадыста 1-ай катэгорыі 226200 рублёў, стаўка сакратара-машыністкі – 151000 рублёў.