Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Дзянісава абяцаюць вызваліць пад заклад 09:58, 20/03/2007
19 сакавіка адвакату моладзевага актывіста Дзяніса Дзянісава адмовілі вызваліць затрыманага да суду пад паручыцельствы вядомых асобаў — вызваленьне такое, па словах сьледчага, магчымае за 15 мільёнаў рублёў.
Дзянісаў знаходзіцца пад сьледзтвам за арганізацыю масавых беспарадкаў ды ўтрымліваецца ў віцебскім сьледчым ізалятары.
“Адвакат сказаў, — паведаміла “Радыё Рацыя” маці затрыманага Раіса Дзянісава, — што патрэбна 15 мільёнаў. Сьледчы на паручыцеляў адмовіў. Мы знайшлі трох паручыцеляў — ён адмовіў. Зараз сказаў: шукайце грошы. Я патэлефанавала ў Менск, ягоным сябрам. Калі яны знойдуць грошы, пытаньне вырашыцца”.
На пытаньне, ці ня ёсьць гэта спробай сьледчага пазбавіць магчымасьцяў яе сына выйсьці на волю, бо гэта вялікая сума грошаў, Раіса Дзянісава заўважыла:
“Можа быць. Таму што я хадзіла да сьледчага і казала яму, а ён гаворыць: “А што гэткага ў 15 мільёнах”. Я кажу: “У мяне і мільёна няма”. Можа яны і разьлічваюць, што я не знайду гэткія грошы. Я іх, канешне, не знайду. Калі толькі запазыку ўзяць... “
Цяпер застаецца чакаць, ці здолеюць сябры і сяброўскія арганізацыі сабраць неабходную колькасьць грошай, а таксама, ці вартыя спадзяваньні на слова сьледчага.
