Расея прапанавала Беларусі адмяніць склады часовага захоўвання для падакцызных тавараў :: Хартыя'97 :: Навiны

Беларусь гатовая адмяніць склады часовага захоўвання для падакцызных расейскіх тавараў, але толькі на ўзаемнай аснове, заявіў журналістам, каментуючы прычыны адтэрміноўкі падпісання пагаднення аб узаемным гандлі паміж Беларуссю і Расеяй, віцэ-прэм’ер урада Беларусі Андрэй Кабякоў, упаўнаважаны на падпісанне гэтага пагаднення, паведамляе “Інтэрфакс”.

“Паводле тэксту дамовы беларускі бок павінен узяць на сябе абавязальніцтва па адмене складоў часовага захоўвання пры ўвозе падакцызных тавараў у Беларусь. Мы згодныя гэта зрабіць на ўзаемнай аснове”, – заявіў А.Кабякоў журналістам. Пры гэтым ён растлумачыў, што расейскі бок сцвярджае, што “палажэнне аб складах часовага захоўвання ў іх у заканадаўстве ёсць, але яны ім не карыстаюцца”.

“Нас гэта не зусім задавальняе. Калі гэтая мера ёсць у заканадаўстве, то расейцы ёю могуць і скарыстацца”, – падкрэсліў віцэ-прэм’ер. Разам з тым А.Кабякоў падзякаваў расейскім партнёрам за тое, “што яны шмат у чым улічылі нашы прапановы, пайшлі нам насустрач, як і беларускі бок па цэлым шэрагу момантаў пайшоў насустрач расейцам”.

Па словах намесніка кіраўніка ўрада, беларускі бок разлічвае на падпісанне пагаднення да канца гэтага тыдня. "Цяпер ідзе дапрацоўка тэксту і яго ўзгадненне зацікаўленымі ведамствамі", – адзначыў А.Кабякоў, дадаўшы, што да канца тыдня можа быць падпісанае і пагадненне аб пастаўках беларускага цукру ў Расею.