Віцэ-прэзідэнт «Транснафты»: Беларусь страціць 50 мільёнаў тон транзіту нафты :: Хартыя'97 :: Навiны

Расея можа ўдвая паменшыць пастаўкі нафты цераз Беларусь – праект абыходнага нафтаправода гатовы. Літва ў гэтым выпадку будзе змушаная завозіць расейскую нафту выключна танкерамі, піша сёння «Газета.ру».

Нафтаправод у абыход Беларусі ўсё-ткі будзе пабудаваны. Праект нафтавага трубаправода ў абыход Беларусі па маршруце «Унеча–Прыморск» ужо ўзгоднены з профільнымі міністэрствамі і перададзены на сцвярджэнне ва ўрад РФ. Віцэ-прэзідэнт кампаніі «Транснафта» (аператара праекту) Сяргей Грыгор’еў удакладніў, што праца па будаўніцтве трубы будзе распачатая, як толькі ўрад выпусціць пастанову, якая вызначае параметры праекту.

Новы праект заклікае знізіць рызыкі па пастаўках расейскай нафты ў далёкае замежжа па нафтаправодзе «Дружба».

Калі новая труба будзе пабудаваная, нафта, прызначаная для прапампоўкі па «Дружба», зможа быць перапраўленая да порта Прыморск і ўжо адтуль танкерамі пайдзе ў краіны Еўразвяза. Мяркуюць, што будаўніцтва новай трубы можа пачацца ўжо ў красавіку гэтага года, а рэалізаваць праект цалкам «Транснафта» разлічвае прыкладна за паўтара года. Меркаваная магутнасць трубаправода складзе 50 млн тон. Прэзідэнт «Транснафты» Сямён Вайншток ужо адзначыў, што расейскія нафтавікі будуць зацікаўленыя ў будаўніцтве трубы ў абыход Беларусі.

Нафтавым кампаніям сапраўды цікавая дыверсіфікаванне маршрутаў паставак. «Нараўне з тарыфамі за транспартоўку нафты і гарантыямі па аб’ёмах пастаўлянай нафты, важным фактарам у нашай працы з’яўляецца і рытмічнасць паставак, – распавялі «Газете.Ru» у прэс-службе «ЛУКойла». – Не павінна быць зрываў або затрымак. А калі на трубаправодзе адбываецца аварыя, або беларускі бок раптоўна перакрывае транзіт цераз сваю тэрыторыю, гэта ўносіць вядомую нярвовасць. Калі «Транснафта» забяспечыць тарыф за транспартоўку нафты, які не перавышае тарыф за прапампоўку цераз тэрыторыю Беларусі, вядома, мы будзем перапраўляць сваю нафту цераз новы адрэзак трубы».

Нягледзячы на тое, што танкерамі перапраўляць нафту даражэй, чым па трубе, пастаўкі цераз прыморск будуць па меншай меры не менш выгодныя, чым цераз тэрыторыю Беларусі. Як растлумачылі ў «ЛУКойле», розніца ў коштах за транспартоўку нафты нівелюецца тым, што пры танкерных пастаўках нафта трапляе напроста ў порты краін-спажыўцоў, абыходзячы беларускае «плячо». Такім чынам, кампаніям не давядзецца плаціць Беларусі за транзіт.

Спрэчкі вакол новага адрэзка «Дружбы» напальваюцца з пачатку года. Справа ў тым, што ўчастак «Унеча–Полацк», які знаходзіцца ў аварыйным стане, быў перакрыты, а нафта па ім, апроч Беларусі, ішла і ў Літву. Танкерныя пастаўкі літоўскі бок не задаволілі, і калі Сямён Вайншток заявіў, што «Унеча–Полацк», магчыма, і не будзе рамантавацца, Літва пачала заклікаць Беларусь і Украіну адмовіцца ад паставак расейскай нафты ўвогуле. Пры гэтым літоўскі бок прапаноўваў такія, мякка кажучы, сумнеўныя альтэрнатывы, як пастаўкі нафты з Венесуэлы.

З пабудовай новага трубаправода Літва ўвогуле пазбавіцца паставак па трубе, а Беларусь страціць вялікую частку транзіту. Як растлумачыў «Газете.Ru» Сяргей Грыгор’еў, у Беларусь цяпер пастаўляецца блізу 100 млн. тон нафты, з якіх 20 млн. тон ідуць на беларускія НПЗ, а астатнія аб’ёмы транзітам сыходзяць у Еўропу. «Калі труба «Унеча-Прыморск» будзе пабудаваная, і менавіта такой магутнасці, як запланавана, Беларусь страціць 50 млн. тон транзіту», – тлумачыць Грыгор’еў.

Ацаніць дакладную лічбу грашовых страт Беларусі пакуль цяжка. Хутчэй за ўсё, гэтая сума складзе даволі вялікую для Беларусі лічбу ў $80–100 млн. Але галоўная страта будзе палітычнай – у Аляксандра Лукашэнкі аднімуць яшчэ адзін рычаг уплыву на міжнародную палітыку.