Віктар Івашкевіч: «Ёсьць каму бараніць Незалежнасьць Беларусі» :: Хартыя'97 :: Навiны

Намеснік старшыні Партыі БНФ Віктар Івашкевіч адказаў на пытаньні слухачоў “Радыё Свабода” наконт святкаваньня 25 сакавіка Дня Волі.

-- Спадар Івашкевіч, як Вы ставіцеся да закліку Аляксандра Мілінкевіча да Лукашэнкі адзначыць 25 сакавіка разам? Пры якіх умовах Вы самі згадзіліся б святкаваць разам з Лукашэнкам?

-- Справа ў тым, што ёсць умовы сфармуляваныя Эўрапейскім зьвязам – вызваліць палітвязьняў, спыніць сілавое падаўленьне вулічных маніфэстацыяў, прыбраць артыкулы Крымінальнага кодэксу, паводле якіх зьяўляюцца гэтыя палітвязьні, даць магчымасьць свабодна распаўсюджваць незалежную прэсу і ўнесьці папраўкі ў выбарчае заканадаўства, каб можна было кантраляваць дзейнасьць выбарчых камісій. Гэта ў комплексе. Але нават калі б Лукашэнка вызваліў усіх палітвязьняў і адмяніў артыкулы, паводле якіх яны туды патрапілі, гэта ўжо была б магчымасьць весьці дыялёг. Нагадаю, што 25 лютага 1990 году Зянон Пазьняк і сакратар кампартыі Сакалоў разам праводзілі мітынг на плошчы Леніна.

-- Калі дакладна будзе вядома месца правядзеньня мітынгу? Усе рыхтуюцца ісьці на плошчу Каліноўскага. Як будуць інфармавацца людзі, калі налепкі з запрашэньнем на пл. Каліноўскага на ўсіх слупах Менску і ня толькі! І дзе можна прачытаць дакладную інфармацыі пра падзеі (расклад іх) на Дзень Волі?

-- Сапраўды, улады далі дазвол на збор на Акадэміі навук, але, як слушна было сказана, людзі прыйдуць на Кастрычніцкую плошчу. Заяўнікі мітынга прыйдуць на Кастрычніцкую плошчу з тым, каб арганізавана прывесьці людзей на Акадэмію навук. Людзі зьбіраюцца на Кастрычніцкай плошчы, і потым арганізавана ідуць на месца дазволенага збору.

- Так гэта свята ці акцыя? Свята павінна быць у душы. Што вы прапануеце для душы?

-- Гэта дэманстрацыя прыхільнікаў Дэмакратыі і Незалежнасьці Беларусі. Кожны прыхільнік дэмакратыі павінен выйсьці на Кастрычніцкую плошчу і тым самым прадэманстраваць, што ёсьць каму бараніць Незалежнасьць Беларусі. А для душы -- няхай кожны прыдумае, як яму сьвяткаваць у цёплай сяброўскай кампаніі.

-- Вы кажаце, што галоўная мэта "прадэманстраваць сьвету... што вялікая колькасьць людзей у Беларусі хоча дэмакратычных пераменаў". Атрымліваецца, дэманстрацыя дзеля дэманстрацыі. Такое я бачу ужо не адзін год, ніякіх вынікаў гэта не прыносіць. Ці здольныя вы на дзеяньні, якія рэбрам паставяць перад уладамі пытаньні вызваленьня палітвязьняў і дэмакратызацыі ўнутраннага жыцьця? Ці ёсьць у вас плян на 25 сакавіка і ці дастаткова ён амбіцыйны?

-- 25 сакавіка гэтага году немагчыма ніякіх пераваротаў, рэвалюцыяў, гвалтоўнага захопу дзяржаўных будынкаў і ўлады. Рэальна прымусіць уладу да нейкіх саступак здолее толькі ўсеагульны страйк ці эканамічны крызыс, а хутчэй – і адно, і другое адначасна. Але каб гэта страйк адбыўся, трэба весьці плянамерную агітацыю сярод мас насельніцтва, што дасягаецца доўгай і ўпартай працай, а не разавымі акцыямі. Акцыя 25 сакавіка – гэта частка агульнага пляну, а не “чароўны ключык”.

-- Дабрыдзень! Як Вы адносіцеся да ініцыятывы Скрабца з Фраловым правесьці 2-га красавіка шэсьце ў гонар “яднаньня” Беларусі і Расіі?

-- Калі заявіцелі мітынгу ішлі на паседжаньне выканкаму, я прапанаваў ім прапанаваць менскім уладам здзелку: беларускія ўлады не разганяюць удзельнікаў акцыі 25 сакавіка, а ўдзельнікі акцыі 25 сакавіка разганяюць самі ўдзельнікаў акцыі 2 красавіка. Гэта жарт, у якім ёсьць доля жарту.

-- Ці будзе Марш свабоды-2007?

-- Увосені гэтага году акцыя апазыцыі будзе абавязкова. Пасьля пачатку атапляльнага сэзону і атрыманьня насельніцтвам новых жыровак за кватэрную плату.

-- Чаго Вы хочаце дамагчыся 25 сакавіка?

-- Мэта – каб крамлёўскія ўлады адмовіліся ад фантазіяў на прадмет “саюзнай дзяржавы” . Другое. Каб Эўразьвяз на перамовах з Менскам працягваў патрабаваць дэмакратычных рэформаў. І каб беларускія ўлады пачалі звыкацца з думкай, што ім давядзецца прызнаць існаваньне з дэмакратычнай апазыцыяй у Беларусі і сесьці зь ёй за стол перамоваў.

-- На одной из встреч Милинкевич заявил, что, если соберется 100 000 человек, то режим падет. Допустим в воскресенье соберутся 100 000. Вы их тоже поведете на Академию Наук?

-- Калі зьбярэцца 100 000 , гэта будзе сьведчыць, што грамадзкія настроі павярнуліся. І тады на перамовы з апазыцыяй прыйдуць прадстаўнікі сілавых структур.

Я спадзяюся, што ўсе людзі, якія маюць і маюць ідэалы свабоды і Незалежнасьці Беларусі, прыйдуць на Кастрычніцкую плошчу і разам з намі пройдуць па праспэкце да Акадэміі навук. Тым самым прадэманстраваўшы іншым беларускім грамадзянам, якія па нейкіх прычынах сядзяць у хаце і ўсяму ўсясьветнаму супольніцтву, які будзе чытаць у інфармацыйных матэрыялах пра гэтую акцыю, што ў Беларусі ёсьць шмат людзей, якія не баяцца адкрыта дэкляраваць свае ідэалы свабоды і Незалежнасьці Беларусі. І гэтая дэманстрацыя павінна адбіць жаданьне марыць пра нейкія інкарпарацыі Беларусі з Расеяй, таму што яны будуць бачыць, што калі гэтулькі людзей за Незалежнасьць, дык займаца "саюзнымі праектамі" няма ніякага сэнсу.

Поўны тэкст форуму на svaboda.org.