Урад Расеі ўхваліў падпісанне пагаднення з Беларуссю аб пастаўках цукру :: Хартыя'97 :: Навiны

Урад Расеі ўхваліў падпісанне пагаднення з Беларуссю аб пастаўках цукру, паведаміла прэс-служба расейскага ўрада. Згодна з распараджэннем прэм’ер-міністра Расейскай Федэрацыі Міхаіла Фрадкова ад 20 сакавіка 2007 года пагадненне даручана падпісаць Міністэрству сельскай гаспадаркі і занесці ў выпадку неабходнасці змены, якія не маюць прынцыповага характару. Праект дакумента ўзгоднены з зацікаўленымі федэральнымі органамі выканаўчай улады Расеі і папярэдне распрацаваныя з беларускім бокам, паведамляе БелаПАН.

Нагадаем, падпісанне дадзенага пагаднення адкладалася ўжо двойчы. Апошнім разам яго планавалася падпісаць 21 сакавіка ў Маскве пасля падпісання пагаднення аб развіцці гандлёва-эканамічнага супрацоўніцтва, бо гэтыя дакументы ўзаемазвязаныя. Аднак падпісанне пагаднення аб развіцці гандлёва-эканамічнага супрацоўніцтва было адкладзенае, мяркуюць, гэта можа адбыцца 23 сакавіка ў Менску на паседжанні Саюзнага Савета міністраў.

Цяпер пастаўкі цукру на расейскі рынак здзяйсняюцца па ранейшай схеме – з поўнай выгрузкай вагонаў на прадмет праверкі яго паходжання. За студзень–люты гэтага года на расейскі рынак пастаўленыя каля 6 тыс. тон цукру. Беларусь узяла на сябе абавязальніцтвы абмежаваць пастаўкі цукру ў Расею ў 2007 годзе аб’ёмам 180 тыс. тон, у 2008 годзе – 100 тыс. тон. Згодна з праектам пагаднення значна спросціцца працэдура пастаўкі беларускага цукру ў Расею, будуць знятыя абмежаванні на мяжы і спыненыя праверкі паходжання цукру, бо вызначаныя аб’ёмы яго паставак.

Запатрабаванне ўнутранага беларускага рынку ў цукру складае 375–400 тыс. тон у год. На экспарт накіроўваецца 90% прадукцыі, і толькі 10% рэалізуецца на ўнутраным рынку. Праблемы з пастаўкамі цукру ў расейскія рэгіёны прымусілі беларускіх вытворцаў шукаць новыя падыходы да выкарыстання сыравінных рэсурсаў. У прыватнасці, разглядаецца пытанне аб выкарыстанні цукровага бурака для таго, каб рабіць біяпаліва.