Лукашэнка праігнаруе візіт Фрадкова? :: Хартыя'97 :: Навiны

Праз некалькі гадзін прэм’ер Расеі Міхаіл Фрадкоў ступіць на беларускую зямлю. Яго візіт у Менск стане першым з’яўленнем расейскага кіраўніка такога ўзроўню з пачатку беларуска-расейскай гандлёвай «войны». Фармальна кіраўнік расейскага ўрада прыбывае ў Менск для ўдзелу ў Савеце міністраў «саюзнай дзяржавы», у парадку дня якога больш за 20 пытанняў наконт эканамічнай, палітычнай, ваеннай і культурнай інтэграцыі дзвюх краін. Складана зразумець пра якую інтэграцыю можа ісці гаворка, калі не вырашанае ніводнае з набалелых пытанняў у двухбаковых стасунках. Так, адмяніўшы тэхнічныя перашкоды на ўвоз расейскага піва, Беларусь увяла мясцовыя падаткі на рознічны продаж імпартных тавараў, што аўтаматычна звяло на нішто згаданы крок насустрач расейскім піваварам.

Так што ж будуць сёння абмяркоўваць беларускі прэм’ер Сяргей Сідорскі і яго расейскі калега Міхаіл Фрадкоў?

«У цэнтры Савета міністраў будзе міждзяржаўнае пагадненне аб развіцці гандлёва-эканамічнага супрацоўніцтва паміж Беларуссю і Расеяй», – сказаў у гутарцы з АФН вядомы эксперт у галіне беларуска-расейскіх стасункаў Андрэй Суздальцаў.

«Абмеркаванне і магчымае падпісанне пагаднення штучна ссунулі на 23 сакавіка», – адзначыў суразмоўца.

Разам з тым, ён лічыць, што сёння расейскаму прэм’еру будзе цяжка ў Менску.

«Беларускі бок будзе істэрычна патрабаваць звароту да “саюзных” датацыйных стасункаў снежня 2006 года», – мяркуе эксперт, але перакананы ва ўстойлівасці лагоднага Фрадкова.

«Расейскі бок, фармальна выявіўшы гнуткасць, насамрэч не саступіць», – сказаў Суздальцаў.

І усё-ткі, па яго словах, сенсацыі варта чакаць з іншага боку – эксперты гадаюць, як паступіць А.Лукашэнка, які прамяняў сочынскі бункер на менскі і ўпарта не хоча паказвацца на публіцы.

«Здаецца неверагодным, каб Лукашэнка не скарыстаўся з’яўленнем расейскага прэм’ера ў Менску, каб данесці праз гутаркі з Фрадковым свае просьбы да расейскага прэзідэнта У.Пуціна», – выказаў здагадку Суздальцаў.

Аднак, можа здарыцца і так, што Лукашэнка праігнаруе візіт Фрадкова. І тое ёсць свае прычыны. Ён выдаткаваў месяц на дарэмныя спробы дастукацца і дамагчыся сустрэчы з Пуціным, вылавіць яго ў Сочы і не толькі. Але за апошні месяц Пуцін правёў масу сустрэч на вышэйшым узроўні – Вугоршчына, Казахстан, Грэцыя, Баўгарыя, Італія, Бельгія, Францыя. Нават у прэзідэнта Украіны была магчымасць сустрэцца з Пуціным, але Віктар Юшчанка зноў спасаваў у апошні момант. Усё адбывалася як у вядомым анекдоце пра нявесту: «Хто за апошні месяц не сустракаўся з Пуціным?». – Лукашэнка: «Я». – «У Вас, Аляксандр Рыгоравіч, саюзная дзяржава з Расеяй, так што яшчэ паспееце. Хто яшчэ ў сакавіку не сустракаўся з Пуціным?».