Пачынаюцца ўрачыстасці з нагоды 50-годдзя Еўразвяза :: Хартыя'97 :: Навiны

У суботу, 24 сакавіка, у Берлін прыбываюць лідэры краін Еўрапейскага Звяза – для ўдзелу ва ўрачыстасцях з нагоды 50-годдзя Рымскай дамовы, паклаўшай пачатак фармаванню ЕЗ.

Федэральная канцлерка Ангела Меркель з нагоды круглай даты распаўсюдзіла зварот, дзе прывітала ўсё насельніцтва Еўразвяза, у якім цяпер старшынствуе Нямеччына, паведамляе РІА “Новости”.

Меркель адзначыла важнасць той акалічнасці, што юбілей прыйшоўся на перыяд старшынства ў ЕЗ Нямеччыны, бо Берлін як ніякі іншы еўрапейскі горад сімвалізуе сабою пераадоленне расколу Еўрапейскага кантынента. “Тут найбольш выразна адчуваецца, наколькі высокую каштоўнасць уяўляе сяброўскае і мірнае суіснаванне дзяржаў”, – падкрэсліла яна.

Кульмінацыяй двухдзённых урачыстасцяў стане нефармальны саміт кіраўнікоў дзяржаў і ўрадаў ЕЗ, які пачнецца ў нядзелю з падпісання Берлінскай заявы ў будынку Нямецкага гістарычнага музея, а пасля пяройдзе ў працоўны абед у гасцініцы Гатэль дэ Ром (Рымскі гатэль).

Першым святочным мерапрыемствам у суботу для кіраўнікоў дзяржаў і ўрадаў ЕЗ стане наведванне канцэрту Берлінскага філарманічнага аркестра. У імпрэзе будзе ўдзельнічаць італьянскі кампазітар Лучано Берыо.

Пасля канцэрту прэзідэнт Нямеччыны Хорст Келер на лужку перад палацам Бельвю дасць святочную вячэру ў гонар вышэйшых госцяў з Еўрапейскага Звяза.

Для простых грамадзянаў у выходныя пройдуць канцэрты еўрапейскіх музыкальных калектываў, а музеі і карцінныя галерэі будуць працаваць нават ноччу.

Урачысты акт падпісання і абвяшчэння Берлінскай заявы – сумеснай заявы ЕЗ, Еўрапарламента і Еўракамісіі – у 12:00 па мясцовым часе. Нефармальны саміт кіраўнікоў дзяржаў і ўрадаў ЕЗ працягнецца за працоўным абедам, які дасць у іх гонар канцлер Ангела Меркель.

Пасля госці і Меркель пабываюць ля Брадэнбургскай брама, у месцах правядзення народных гулянняў, наведаюць так званыя інфармацыйныя стэнды еўрапейскіх дзяржаў. Звыш 70 такіх стэндаў дэманструюць шлях, які прайшоў Еўразвяз з моманту падпісання Рымскай дамовы.

Пасля абеду Меркель разам з старшынёй Еўракамісіі Жазэ Мануэлем Барозу дасць на плошчы Парызерплац старт так званаму інфармацыйнаму туру Еўропе – 50 гадоў. Сігнал да старту мерапрыемства дадуць школьнікі з 27 дзяржаў-сябраў, якія запусцяць пяць тысяч паветраных шароў з надпісам Еўропа.

Бундэстаг у рамках урачыстасцяў расчыніць свае дзверы для ўсіх жадаючых азнаёміцца з працай парламента, а дэпутаты будуць гатовыя выслухаць ад госцяў крытыку ў свой адрас.