Пасланне народу Беларусі Прэзідэнта Еўрапейскай Камісіі Жазэ-Мануэля Барозу :: Хартыя'97 :: Навiны

Пяцьдзесят гадоў таму ў Рыме пачала рэалізоўвацца мара пра аб’яднаную Еўропу. З таго часу гэтая ідэя фундаментальна змяніла еўрапейскі кантынент. Там, дзе раней было замкнёнае кола пастаянных разбуральных войнаў, мір і дабрабыт зараз зрабіліся правілам. Так узнікла ўнікальная прастора стабільнасці і дэмакратыі, заснаваная на павазе да нацыянальнай самабытнасці, а таксама на прымірэнні, свабодзе і салідарнасці. ЕС таксама ўзнік у новай якасці самастойнага актора на глабальным узроўні. І мы, еўрапейцы, справядліва ганарымся гэтым.

У гэты важны дзень, як для Еўропы, так і для Беларусі, я хацеў бы падкрэсліць гэтыя дасягненні Еўрапейскага Саюзу, якія непарыўна звязаныя з глыбока ўкаранёнымі каштоўнасцямі дэмакратыі, правоў чалавека і вяршэнства закону, і яшчэ раз нагадаць беларускаму народу, што Еўрапейскі Саюз гатовы перайсці да поўнага партнерства з Беларуссю, заснаванага на гэтых каштоўнасцях і накіраванага на дасягненне гэтых мэтаў. Я спадзяюся, што хутка мы ўбачым жаданне рухацца ў гэтым напрамку. Такое партнерства азначала б, што дапамога Еўрапейскага Саюзу Беларусі магла б значна павялічыцца, і гэта магло б дапамагчы палепшыць якасць жыцця беларусаў.

Я ўпэўнены, што народ Беларусі бачыць гэтую працягнутую руку, як магчымасць выбраць дэмакратычную будучыню, і я вельмі спадзяюся, што ўрад Беларусі адкажа ўзаемнасцю, пачаўшы патрэбныя іх народу рэформы і спыніўшы сваю самаізаляцыю.

Я чакаю таго дня, калі Беларусь займе сваё належнае месца ў Еўрапейскай сям’і, якая падзяляе каштоўнасці дэмакратыі, правоў чалавека і вяршэнства закону, і якая імкнецца да даўгавечнага агульнага міру і дабрабыту.

25 сакавіка 2007 г.