Лукашэнка працуе з дакументамі :: Хартыя'97 :: Навiны

“Кіраўнік дзяржавы знаходзіцца ў сваёй рэзідэнцыі ў Менску, прымае службоўцаў з дакладамі, працуе з дакументамі. Усё ў звычайным рэжыме”, – паведаміў БелаПАН кіраўнік прэс-службы прэзідэнта Павел Лёгкі. Апошнімі днямі ў інтэрнэце з’явіліся чуткі пра тое, што Аляксандр Лукашэнка даўно не з’яўляецца на публіцы з прычыны праблем са здароўем. Апошні раз яго паказвалі па тэлебачанні 10 сакавіка, калі ён адкрываў горналыжны комплекс у Краснай Паляне (Расея).

“Чуткі ў дадзенай сітуацыі – цалкам зразумелая і натуральная рэч, абсалютна натуральны працэс. Варта толькі некалькі дзён кіраўніку дзяржавы не з’яўляцца на экранах, як тут жа пачынаюцца ўсякага роду здагадкі”, – сказаў П.Лёгкі.

Ён таксама не пацвердзіў інфармацыю, распаўсюджаную шэрагам СМІ са спасылкай на МЗС В’етнама, пра тое, што чаканы візіт А.Лукашэнкі ў гэтую краіну 25–27 сакавіка быў адкладзены па просьбе беларускага боку. “Візіт быў запланаваны, але на дадзены момант у мяне няма інфармацыі пра пэўныя тэрміны візіту”, – сказаў кіраўнік прэс-службы прэзідэнта.

Нагадаем, што 25 сакавіка ў Менску адбылася масавая 10-тысячная акцыя апазіцыі ў Дзень Волі. У апошні раз Лукашэнка знік амаль на два тыдні пасля прэзідэнцкіх выбараў у мінулым годзе. Тады на Кастрычніцкай плошчы Менска праходзілі шматтысячныя дэманстрацыі супраць фальсіфікацыі вынікаў выбараў.