Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
У Маскве адбыўся мітынг салідарнасці з беларускай апазіцыяй (Фота) 11:51, 26/03/2007
25 сакавіка ў Маскве каля амбасады Беларусі адбыўся прымеркаваны да Дня Волі пікет у падтрымку беларускай апазіцыі, наладжаны рухамі «Змена» і «Абарона». Пікетчыкі перадалі ў амбасаду петыцыю з патрабаваннем вызваліць затрыманую 23 сакавіка ў Магілёве моладзевую актывістку Крысціну Шацікаву.
Паводле наяўных дадзеных, цяпер Крысціну Шацікаву, маці дваіх дзяцей, сілком утрымліваюць у псіхіятрычнай лякарні, адзначаецца ў паведамленні Валянціны Чубаравай, грамадзянскай актывісткі, удзельніцы пікету і суаўтара петыцыі. Дакумент змяшчае патрабаванне вызваліць Шацікаву і іншых палітвязняў, а таксама прыцягнуць да адказнасці ўсіх тых, хто аддаваў і выконваў загады аб рэпрэсіях супраць дэмакратычных актывістаў. “Вы нічога не даможацеся сваімі жаласнымі спробамі запалохаць вальнадумных людзей”, – звяртаюцца аўтары петыцыі да беларускіх улад. Пад ёй стаіць больш дваццаці подпісаў грамадзянаў Расеі і Беларусі.
Удзельнікі акцыі трымалі плакаты: “Беларусь без Лукашэнкі”, “За нашу і вашу свабоду”, “Сябры, мы з вамі”, партрэты Шацікавай з подпісам: “Дзе Крысціна?», сцягі арганізацый-удзельніц пікету, а таксама сцягі Расеі, аб’яднанай Еўропы і нацыянальныя беларускія бел-чырвона-белыя сцягі. Людзі скандавалі: “Жыве Беларусь!”, “Свабоду Крысціне Шацікавай!”.
Аб’яднаная грамадзянская партыя Беларусі мае намер звярнуцца да прадстаўнікоў офіса АБСЕ, а таксама дыпламатычных місій, каб сумесна выехаць у Магілёў і вызваліць Крысціну Шацікаву з псіхіятрычнага шпіталя, паведаміла прэс-служба АГП. Партыя мае намер ініцыяваць правядзенне публічных акцый салідарнасці з Шацікавай у Магілёве.
, iнформэр
