Беларусь у вялікім даўгу перад Расеяй :: Хартыя'97 :: Навiны

Хоць Беларусь і “Газпром” дамовіліся, што плаціць за газ з новага года мы будзем 100 даляраў, па новых цэнах краіна дагэтуль не разлічваецца.

– Цяжка ідзе гэтая адаптацыя. Таму трэба сказаць, што на сёння мы маем паўгадавы спрыяльны момант разлікаў з “Газпромам”. Аплачваем 55% ад аб’ёму атрыманага газу. І калі прапрацуем першае паўгоддзе, павінны спрагназаваць і бачыць сітуацыю, – паведаміў міністр энергетыкі Беларусі Аляксандр Азярэц на прэс-канферэнцыі пасля гадавога сходу акцыянераў “Белгазпромбанка”.

За складанай фразай міністра ўтоенае простае тлумачэнне, піша “КП в Беларуси”. Першыя паўгода Беларусь плаціць не 100 даляраў за тысячу кубаметраў газу, а 55! Гэта значыць сапраўднай цаны краіна дагэтуль не прачула. Па сутнасці, газ, у параўнанні з мінулым годам, падаражэў пакуль толькі на 8 даляраў. Тым не менш, вяртаць грошы, хоць і праз паўгода, але ўсё роўна давядзецца. Да лета Беларусь падлічыць свае фінансы, і калі іх будзе неставаць, возьме на газ крэдыт.

– Пакуль з беларускага боку пытанняў крэдытавання паставак газу не паступала. І мы зыходзім з таго, што Рэспубліка Беларусь у стане разлічыцца за газ, які пастаўляецца “Газпромам”. Калі ж такое пытанне будзе зададзенае, то мы яго разгледзім, – запэўніў намеснік старшыні праўлення “Газпрома” Андрэй Круглоў.