Шахцёры выйдуць пратэставаць 10 красавіка :: Хартыя'97 :: Навiны

“Савет міністраў, рукі прэч ад ільготных пенсій!” – з такім лозунгам збіраюцца выйсці на мітынг сябры ўваходнага ў Федэрацыю “Белхімпрафсаюза” працаўнікоў ПА “Беларуськалій”, паведамляе www.praca-by.info. Прэзідыум прафкома прыняў пастанову аб правядзенні 10 красавіка мітынгу-пратэсту з патрабаваннем выключыць з праекту Закона “Аб прафесійным пенсійным страхаванні” норму, згодна з якой працаўнік не зможа атрымоўваць датэрміновую пенсію, калі будзе працягваць працаваць у шкодных умовах працы.

Пяршоўка “Белхімпрафсаюза” сабрала больш за дзевяці тысяч подпісаў супраць меркаванай адмены выплаты датэрміновых пенсій, накіравала іх у Адміністрацыю прэзідэнта, Савет Міністраў, дэпутатам парламента і дагэтуль ні ад каго не атрымала пэўнага адказу. Пасля гэтага прафсаюз вырашыў правесці масавую акцыю пратэсту. Арганізатары плануюць вывесці на мітынг пяць тысяч чалавек. «Усе на мітынг! Пакажам дзяржаўным службоўцам сваю рашучасць і салідарнасць, прымусім іх паважаць інтарэсы народа!», гаворыцца ў звароце аргкамітэта прафкома “Белхімпрафсаюза”.

Нагадаем, 13 красавіка Незалежны прафсаюз гарнякоў працаўнікоў “Беларуськалія” таксама мае намер правесці на цэнтральнай плошчы Салігорска мітынг з патрабаваннем захаваць ільготныя пенсіі.