Ханс-Георг Вік: Каб нармалізаваць стасункі з Беларуссю, ЕЗ не трэба ўступаць у дыялог з рэжымам :: Хартыя'97 :: Навiны

Стасункі Еўропы і Беларусі зайшлі ў тупік, лічыць адзін з вядучых еўрапейскіх экспертаў па Беларусі Ханс-Георг Вік. Падчас інтэрв’ю «Нямецкай хвалі» эксперт заявіў, што для таго, каб нармалізаваць стасункі з Беларуссю, ЕЗ зусім не абавязкова ўступаць у дыялог з аўтарытарным рэжымам, а таксама пракаментаваў масавыя акцыі ў Менску, прымеркаваныя да Дня Волі.

“Развіццё падзей прадбачыць цяжка. Лукашэнка спрабуе, як ён рабіў і раней, выкарыстаць напружаныя стасункі Беларусі і Расеі, каб палепшыць свой імідж на Захадзе. Але мы ведаем, што ў большасці краін свету стаўленне да рэжыму Лукашэнкі адмоўнае. Ён хоча прымусіць Маскву паважаць сябе, хоча, каб там убачылі, што на Захадзе ў ім бачаць партнёра. Лукашэнка ўжо не раз казаў, што мае намер супрацоўнічаць з Еўропай, спадзяваўся на падтрымку тых палітыкаў, хто лічыць, што эканамічнае супрацоўніцтва стаіць на першым месцы, а наяўнасць дэмакратыі ў краіне – гэта другаснае. Але такі падыход у сучасным ЕЗ ужо не актуальны. Еўропа павінна заняць больш пэўную пазіцыю і арганізаваць дыялог з грамадзянскай супольнасцю, якая ў Беларусі, як і ў Еўропе, шматаблічная. Еўропа павінна скаардынаваць намаганні”, – лічыць Ханс-Георг Вік.

Па словах палітыка, на еўрапейскім узроўні неабходна ўвесці пасаду каардынатара – чалавека, адказнага за супрацоўніцтва з Беларуссю па лініі грамадзянскай супольнасці і за дыялог з апазіцыяй. “Ён павінен будзе дапамагаць беларусам пры распрацоўцы стратэгіі развіцця краіны пасля падзення рэжыму Лукашэнкі”, – лічыць нямецкі палітык.