Віктар Януковіч: «Дэмакратызацыя Беларусі будзе паскораная» :: Хартыя'97 :: Навiны

Прэм’ер-міністр Украіны Віктар Януковіч выказаў надзею, што ў Беларусі будуць паскораныя працэсы дэмакратызацыі. “Мы спадзяемся, што працэс дэмакратызацыі беларускага грамадства будзе паскораны. Калі зменіцца сістэма ўлады? Мы лічым у самы блізкі час, а калі гэта будзе – цяжка сказаць, я не прадракальнік”, – заявіў Віктар Януковіч 27 сакавіка пасля размовы з старшынёй Еўрапейскага парламента Гансам-Гертам Потэрінгам.

“Сёння працэсы ў Беларусі выклікаюць незадаволенасць у грамадстве. Мы як суседзі ведаем, што там адбываецца. Хоць там назіраецца паступовы працэс дэмакратызацыі краіны, і робяць яго жыхары прымежных раёнаў”, – удакладніў Віктар Януковіч.

На думку ўкраінскага прэм’ер-міністра, незадаволенасць у беларускім грамадстве ўзнікае з прычыны магчымасці жыхароў прымежных рэгіёнаў параўноўваць свой узровень жыцця з суседзямі.

У сваю чаргу, кіраўнік Еўрапарламента заявіў пасля сустрэчы з Віктарам Януковічам, што бакі прыйшлі да агульнай пазіцыі наконт Беларусі.

“Мы прыйшлі да згоды, што мы ў Еўропе. Як і народ Украіны, мы зацікаўленыя ў развіцці свабоднай дэмакратыі і, у прыватнасці, свабоды Беларусі, падтрымцы лідэра апазіцыі Мілінкевіча і ліквідацыі апошняй дыктатуры ў Еўропе”, – паведаміў Ганс-Герт Потэрынг.