Даклад Адрыяна Севярына раззлаваў беларускія ўлады :: Хартыя'97 :: Навiны

Дзейнасць спецыяльнага дакладчыка ААН па пытанні аб становішчы ў сферы правоў чалавека ў Беларусі Адрыяна Севярына і шэрагу іншых краінавых дакладчыкаў стала адной з прычын вострага крызісу ў Камісіі па правах чалавека, яе дыскрэдытацыі і наступнаму расфармаванні. Пра гэта 29 сакавіка заявіў прэс-сакратар Міністэрства замежных спраў Беларусі Андрэй Папоў, каментуючы БелаПАН прычыны адмовы Беларусі супрацоўнічаць з А.Севярынам.

А.Папоў адзначыў, што ў рамках створанага замест камісіі Рады ААН па правах чалавека ў сапраўдны момант “працягваюцца вельмі сур’ёзныя і досыць вострыя дыскусіі па цэлым шэрагу пытанняў”, у тым ліку па стварэнні сістэмы ўніверсальнага агляду сітуацыі ў галіне правоў чалавека ва ўсіх краінах свету. “У рамках гэтай працы пакуль зусім не дасягнутая згода па пытанні аб тым, ці будуць у Радзе па правах чалавека захаваныя так званыя краінавыя працэдуры, пры якіх умовах яны будуць стварацца і як будуць дзейнічаць”, – сказаў А.Папоў. Ён падкрэсліў, што Беларусь бярэ актыўны ўдзел у абмеркаванні, паведамляе БелаПАН.

“Наша пазіцыя па гэтым пытанні нашым партнёрам добра вядомая, – сказаў прэс-сакратар. – Вельмі шмат краін – сябры Рады нашу логіку па гэтым пытанні падзяляюць і падтрымліваюць беларускую пазіцыю”. Прыкладам такой падтрымкі, на меркаванне А.Папова, можа служыць прынятая падчас апошняй сесіі Генеральнай асамблеі ААН з ініцыятывы Беларусі рэзалюцыя, якая заклікае да “невыбарчага, транспарэнтнага і ўніверсальнага падыходу ў галіне разгляду правачалавечай праблематыкі ў свеце”.

У сваім дакладзе пра сітуацыю з правамі чалавека ў 2006 годзе А.Севярын падкрэсліў, што трэці год запар урад Беларусі катэгарычна адмаўляецца супрацоўнічаць з ім. “Даклад сведчыць пра тое, што Беларусь не выконвае абавязальніцтваў, прынятых згодна з міжнароднымі дамовамі па правах чалавека, да якіх яна далучылася”, – адзначае А.Севярын. Ён мае намер рэкамендаваць Радзе бяспекі ААН “прыняць адпаведныя меры для забеспячэння захоўвання Рэспублікай Беларусь яе прававых абавязальніцтваў”.