Апазыцыянэры застаюцца за кратамі ў Менску, Гомелі, Віцебску, Барысаве :: Хартыя'97 :: Навiны

Сёньня зь менскай турмы на Акрэсьціна, а таксама з-пад арышту ў рэгіёнах вызвалена яшчэ некалькі палітвязьняў. Усіх іх – удзельнікаў падрыхтоўкі і сьвяткаваньня Дня Волі – абвінавацілі ў дробным хуліганстве альбо непадпарадкаваньні міліцыі. Але, як паведамляе “Радыё Свабода”, апазыцыянэры застаюцца за кратамі ў Менску, Гомелі, Віцебску, Барысаве.

А пятай гадзіне раніцы з ізалятару часовага ўтрыманьня Мастоўскага райаддзелу міліцыі вызвалілі Зьмітра Кухлея — дэпутата мясцовага райсавету. Зьміцер Кухлей быў затрыманы ў Мастах 24 сакавіка. Як дэпутат райсавету ён запатрабаваў выклікаць адваката. Але на месцы міліцыянты не знайшлі юрыста. Каб дамовіцца пра дапамогу адваката, Зьміцер зьехаў у Менск.

“У Менску таксама ўдзельнічаў у сьвяткаваньні Дня Волі. І вось калі я ўжо вяртаўся назад, пры выхадзе зь цягніка ў 4.50 раніцы мяне ўжо чакаў нарад міліцыі”, — апавёў спадар Кухлей.

На Гарадзеншчыне сёньня вызвалены Ігар Бонцар. У Магілёве — Максім Азараў. А ў Менску родныя і сябры чакаюць моладзевага лідэра Аляксандра Атрошчанкава. Жонка палітвязьня Дар’я Корсак хвалюецца за Аляксандрава здароўе:

“Яго зьбілі пры затрыманьні. Павалілі на зямлю, калі ён быў закаваны ў кайданкі. Джынсы парвалі. Таксама на судзе ён казаў, што на целе ёсьць сінякі і кровападцёкі”, -- паведаміла Дар’я Корсак.

Сёньня ў Берасьці вызвалены ад плянаванага ў гэты дзень суду старшыня гарадзкой арганізацыі Партыі БНФ Зьміцер Шыманскі.

“Цяпер я сустракаўся з намесьнікам старшыні Берасьцейскага гарвыканкаму Вячаславам Хафізавым. Фактычна мясцовая ўлада ня ведае, хто павінен складаць пратаколы за распаўсюджваньне друкаванай прадукцыі. Пакуль яны не выходзяць на суд”, -- паведаміў актывіст.

Нагадаем, што Зьміцер Шыманскі быў затрыманы ў Берасьці разам з грамадзкімі актывістамі Юр’ем Жыдовічам і Антонам Стасюком 25 сакавіка за распаўсюджваньне недзяржаўнага бюлетэню “Воля”.

На гэты момант у турме на Акрэсьціна застаецца да 2 красавіка Барыс Гарэцкі. У Гомелі за кратамі Ўладзімер Кацора. У Віцебску — Барыс Хамайда. У Барысаве — Ігар Леднік.