Сямашка: Расея будзе разлічвацца за «Белтрансгаз» выключна грашыма :: Хартыя'97 :: Навiны

ААТ "Газпром" будзе разлічвацца за акцыі "Белтрансгаза" выключна грашовымі сродкамі, заявіў журналістам першы віцэ-прэм’ер урада Беларусі Уладзімір Сямашка. "У нашых дамоўленасцях выразна абумоўленае, што сродкі за акцыі "Белтрансгаза", у тым ліку $625 млн. за 12,5% акцый паступяць жывымі грашыма ў бюджэт. Заліку ў кошт аплаты паставак газу не прадугледжана", – сказаў У.Сямашка.

Ён падкрэсліў, што такая прынцыповая пазіцыя захоўваецца, нягледзячы на тое, што Беларусь у першым паўгоддзі гэтага года па дамоўленасці з Газпромам, аплачвае толькі 55% кошту паставак газу. Па словах У.Сямашка, да 100% аплаты паставак Беларусь павінна прыступіць з 1 ліпеня 2007 года, паведамляе “Інтэрфакс”.

"Мы дамовіліся з Газпромам, што ў першым паўгоддзі будзем часткова аплачваць кошт газу – на ўзроўні 55%. Гэтае рашэнне дазволіць нам адаптавацца і памякчыць шок ад падвышэння цэнаў", – сказаў ён.

Пры гэтым У.Сямашка не асцерагаецца таго, што наяўны доўг створыць праблемы ў далейшых разліках з Газпромам. "Раней у нас быў доўг перад Газпромам у памеры больш як 300 млн. даляраў, які ўжо цалкам ліквідаваны", – сказаў У.Сямашка.

Між іншым, ён канстатаваў, што не ўсе беларускія прадпрыемствы здольныя аплаціць у поўным аб’ёме пастаўкі газу па новых тарыфах. "Мы за кошт бюджэту дапамагаем ім", – сказаў першы віцэ-прэм`ер.

У.Сямашка таксама паведаміў, што ўрад Беларусі мае намер неўзабаве распачаць "шэраг зрухаў", якія дапамогуць стабілізаваць сітуацыю з унутранымі разлікамі за газ. Не ўдакладняючы, пра якія менавіта меры ідзе гаворка, ён сказаў, што "гэта дапаможа выправіць сітуацыю".