Створаны аргкамітэт па правядзенні «Чарнобыльскага шляху» :: Хартыя'97 :: Навiны

Створаны аргкамітэт па правядзенні 26 красавіка ў Менску традыцыйнай штогадовай акцыі “Чарнобыльскі шлях”. Яго ўзначаліў член-карэспандэнт Нацыянальнай акадэміі навук Беларусі прафесар Іван Нікітчэнка.

Рашэнне аб стварэнні аргкамітэта прынятае 29 сакавіка ў Менску на паседжанні яго заснавальнікаў, у якім удзельнічалі прадстаўнікі шэрагу партый, у тым ліку Партыі БНФ, Аб’яднанай грамадзянскай партыі, Партыі камуністаў Беларускай, Беларускай сацыял-дэмакратычнай партыі (Грамада).

Канчатковы склад аргкамітэта вызначыцца на яго першым працоўным паседжанні, запланаваным у сталіцы на 3 красавіка. У гэты самы дзень раніцай арганізатары маюць намер падаць заяўку на правядзенне акцыі ў Менгарвыканкам.

На сённяшнім паседжанні абмяркоўваўся маршрут шэсця. Арганізатары прапаноўваюць пачаць яго а 18 гадзіне ад плошчы Якуба Коласа, каб потым удзельнікі шэсця прайшлі па ходніках праспекта Незалежнасці да плошчы перад будынкам Нацыянальнай бібліятэкі Беларусі.

Старшыня Партыі БНФ Вінцук Вячорка прапанаваў дэлегацыі аргкамітэта напачатку шэсця (а 17 гадзіне) ускласці кветкі да мемарыяльнага знака каля храма іконы Божай Маці “Вяртанне страчаных” у Парку дружбы народаў і правесці набажэнства, а потым далучыцца да акцыі. На думку палітыка, тэрыторыя ў раёне храма не дазваляе правесці паўнавартасны мітынг удзельнікаў "Чарнобыльскага шляху".

Як адзначыў намеснік старшыні Партыі БНФ Віктар Івашкевіч, на наступным паседжанні аргкамітэта трэба будзе зацвердзіць склад працоўных груп па розных кірунках, у тым ліку па працы з СМІ, з навукоўцамі, міжнароднай супольнасцю, па пытанні мэтазгоднасці будаўніцтва АЭС у Беларусі і праблемам атрымання замежнай гуманітарнай дапамогі.

У інтэрв`ю БелаПАН В.Івашкевіч выказаў перакананасць, што па традыцыі "Чарнобыльскі шлях", як мірная акцыя грамадзянаў Беларусі, пройдзе без гвалту з боку дзяржаўных структур. "Цяперашні шлях адрозніваецца ад папярэдніх новым маршрутам і задачамі. Гэтым разам мы праводзім штогадовую акцыю ў сітуацыі энергетычных праблем, якія насоўваюцца на краіну, і магчымай мадэрнізацыі айчыннай энергетыкі з дапамогай інвестыцый Еўразвяза пры ўмове вызвалення палітвязняў", – падкрэсліў В.Івашкевіч. Па яго словах, рашэнне постчарнобыльскіх праблем магчымае толькі пры дэмакратызацыі краіны.