У Маскве прадстаўленыя апошнія прэм’еры «Свабоднага тэатра» і фільм «Плошча» (Фота) :: Хартыя'97 :: Навiны

23–24 сакавіка на сцэнах тэатральнага Цэнтра ім. Ус. Мейерхольда «Свабодны тэатр» прадставіў два прэм’ерных спектакля 2006 года – «Быць Гаральдам Пінтэрам» і «Пакаленне Jeans». Гастролі «Свабоднага тэатра» у ЦіМе можна лічыць традыцыйнымі – узімку 2006 года тэатр ужо гастраляваў на гэтай пляцоўцы і атрымаў вельмі добрую крытыку.

Другім разам кіраўніцтва Цэнтра ім. Ус. Мейерхольда бясплатна выдзяляе пляцоўку беларускаму тэатру для гастроляў. І другім разам гастролі падпольнага «Свабоднага тэатра» у Маскве праходзяць пры пільнай увазе расейскіх журналістаў і крытыкі. Практычна ўсе вядучыя выданні Масквы, прысвечаныя вольнаму часу, размясцілі анонсы спектакляў беларускага тэатра, а на спектаклях прысутнічалі не толькі крытыкі, але і цэлы шэраг замежных журналістаў, акрэдытаваных у Маскве.

Менавіта журналісты дапамаглі тэатру, які не мае датацыяў і якога-небудзь фінансавання, пераадолець фінансавыя цяжкасці гастроляў. Калі летась пражыванне ў гасцініцы супрацоўнікаў тэатра дапамаглі аплаціць журналісты нямецкай тэлекампаніі ZDF, то сёлета прыйшла дапамога ад журналістаў карпункту «Нямецкай Хвалі» і часопіса Newsweek.

Цікавасць да «Свабоднага тэатра», якая была выказаная расейскай прэсай летась, не толькі не знікла, але, здаецца, разгарэлася з новай сілай. І віной таму не толькі новыя спектаклі тэатра, але і стасункі паміж дзвюма краінамі, якія апошнім часам ускладніліся. Паўгадзінны эфір на радыё «Маяк», гадзінны эфір у праграме «Культурны шок» на радыё «Эхо Москвы», сюжэты на вядучых расейскіх тэлеканалах і падрыхтаваныя матэрыялы друкаванымі і Інтэрнэт выданнямі сведчаць пра інтарэс расейскіх сродкаў масавай інфармацыі да прадстаўнікоў беларускай контркультуры.

Цяперашняя праграма гастроляў «Свабоднага тэатра» мела ярка выяўленую сацыяльна-палітычную скіраванасць. Абодва спектакля артыкулявалі калі не палітычную, то, ужо сапраўды, грамадзянскую пазіцыю тэатра. Гэтаму спрыяў і паказ новага дакументальнага фільма Юрыя Хашчавацкага «Плошча», прысвечанага падзеям гадавой даўнасці, калі на вуліцы Менска выйшлі каля 40 тысяч чалавек, а паўтары тысячы беларусаў былі арыштаваныя. Фільм «Плошча» быў вельмі цяпло сустрэты маскоўскімі гледачамі. Ён і завяршыў праграму гастроляў тэатра ў Цэнтры ім. Ус. Мейерхольда.

Тэатральны крытык Рыгор Заслаўскі і Мікалай Халезін у эфіры радыё “Маяк”

Арганізатар гастроляў арт-дырэктар Цэнтра ім.Ус.Мейерхольда Павал Руднёў

Уладзімір Шчэрбань дае інтрв’ю тэлеканалу РТР

Спектакль «Пакаленне Jeans»

Мікалай Халезін і Наталля Каляда з вядучай праграмы “Культурны шок” на радыё “Эхо Москвы” Ксеніяй Ларынай

Спектакль «Быць Гаральдам Пінтэрам»

Паказ фільма Юрыя Хашчавацкага “Плошча” ў чорнай залі Цэнтра ім. Ус. Мейерхольда

Ганна Макоўская, www.dramaturg.org