Банкам бракуе валюты :: Хартыя'97 :: Навiны

Старшыня праўлення ААТ "Приорбанк" Сяргей Касцючэнка прапанаваў ураду Беларусі прыняць меры па прыцягненні сродкаў беларускіх даляравых мільянераў у мясцовыя банкі. "У Беларусі не менш як 7–10 тыс. даляравых мільянераў. Задача дзяржавы – падумаць, якім чынам гэтыя сродкі прыцягнуць на рахункі ў банках", – сказаў С.Касцючэнка, выступаючы ў пятніцу ў Менску на 4-м пленарным паседжанні Кансультатыўнага савета па замежных інвестыцыях пры ўрадзе Беларусі.

С.Касцючэнка паведаміў, што ў “Приорбанке” “ёсць толькі 2 рахункі, на кожным з якіх больш як 1 млн. даляраў”. У якасці прыкладу ён адзначыў, што ў Райфайзенбанк-Украіна маецца 650 рахункаў сумай не менш як 1 млн. даляраў, паведамляе «Інтэрфакс».

Звяртаючыся да сяброў урада С.Касцючэнка сказаў: "Калі ў нас прыцягнуць хоць бы адну тысячу мільянераў у банкі, то гэта ўжо мільярд даляраў рэсурсаў для банкаўскай сістэмы", – сказаў кіраўнік “Приорбанка”.

Пры гэтым ён канстатаваў, што банкаўскай сістэме Беларусі бракуе рэсурсаў і, адпаведна, не стае актываў. Банкаўскія актывы ў іншых краінах, якія развіваюцца, істотна перавышаюць узровень Беларусі, у якой доля актываў банкаў да ВУП складае 37%.

На яго думку, перспектыўнымі для развіцця ў Беларусі з’яўляюцца страхавы і фондавы рынак менавіта ў сілу іх недастатковай развітасці. Паводле яго дадзеных, у Беларусі гадавы збор страхавых прэмій складае менш як 1% ВУП, а на 1 жыхара рэспублікі сума сабраных за год страхавых прэмій складае ў эквіваленце 20 еўра. Пры гэтым С.Касцючэнка канстатаваў адсутнасць у Беларусі альтэрнатыўнага пенсійнага страхавання, якое патэнцыйна можа стаць крыніцай доўгатэрміновых рэсурсаў для фінансавай сістэмы.

Кіраўнік “Приорбанка” таксама падкрэсліў, што ў Беларусі "фондавы рынак не іграе ролю прылады эканамічнага развіцця". "У беларускіх прадпрыемстваў абмежаваны доступ да міжнародных крыніц капіталу. Асноўная крыніца фінансавання для іх – гэта ўласныя і бюджэтныя сродкі", – дадаў ён.