Клімаву пагражае ад двух да пяці гадоў пазбаўлення волі? :: Хартыя'97 :: Навiны

Раніцай 3 красавіка ў Менску быў арыштаваны палітык Андрэй Клімаў. Супрацоўнікі міліцыі даставілі яго ў пракуратуру горада Менска. Яму інкрымінуецца злачынства, прадугледжанае артыкулам 361 Крымінальнага кодэкса Беларусі (заклікі да гвалтоўнага звяржэння дзяржаўнага ладу). Пакуль незразумела ў парушэнні якой часткі арт. 361 КК РБ абвінавачваецца Андрэй Клімаў.

Падставай для крымінальнай справы стала публікацыя Андрэя Клімава, размешчаная на інтэрнэт-сайце Аб’яднанай грамадзянскай партыі пад загалоўкам “Revolution forever або Як правільна разбіраць цыганскага кабана ў год свінні”. У артыкуле Андрэй Клімаў піша пра дачыненне Аляксандра Лукашэнкі да выкраданняў і забойстваў лідэраў беларускай апазіцыі. Аднак інтэрнэт-сайт не з’яўляецца сродкам масавай інфармацыі. Улады даўно збіраюцца прыраўняць сайты да СМІ, аднак заканадаўча гэта дагэтуль не аформленае.

Прыводзім палажэнні арт. 361 КК РБ:

Артыкул 361 КК РБ. Заклікі да дзеянняў, накіраваных у шкоду знешняй бяспекі Рэспублікі Беларусь, яе суверэнітэту, тэрытарыяльнай недатыкальнасці, нацыянальнай бяспекі і абароназдольнасці

1. Публічныя заклікі да захопу дзяржаўнай улады, або гвалтоўнай змены канстытуцыйнага ладу Рэспублікі Беларусь, або здрады дзяржаве, або здзяйснення тэрарыстычнага акту або дыверсіі, або здзяйснення іншых дзеянняў у шкоду знешняй бяспекі Рэспублікі Беларусь, яе суверэнітэту, тэрытарыяльнай недатыкальнасці, нацыянальнай бяспекі і абароназдольнасці альбо распаўсюджванне матэрыялаў, якія змяшчаюць такія заклікі, – караюцца арыштам на тэрмін да шасці месяцаў або пазбаўленнем свабоды на тэрмін да трох гадоў.

2. Заклікі, звернутыя да замежнай дзяржавы, замежнай або міжнароднай арганізацыі, здзейсніць дзеянні ў шкоду знешняй бяспекі Рэспублікі Беларусь, яе суверэнітэту, тэрытарыяльнай недатыкальнасці, нацыянальнай бяспекі і абароназдольнасці альбо распаўсюджванне матэрыялаў, якія змяшчаюць такія заклікі, пры адсутнасці прыкмет больш цяжкага злачынства – караюцца арыштам на тэрмін да шасці месяцаў або пазбаўленнем свабоды на тэрмін да трох гадоў.

3. Дзеянні, прадугледжаныя часткамі першага або другога сапраўднага артыкула, здзейсненыя з выкарыстаннем сродкаў масавай інфармацыі, – караюцца пазбаўленнем свабоды на тэрмін ад двух да пяці гадоў.