Міністр культуры адмовіўся глядзець выставу «Пагоні» (Фота) :: Хартыя'97 :: Навiны

Сёння Палац мастацтваў, дзе праходзіць выстава суполкі “Пагоня”, наведаў міністр культуры Уладзімір Матвяйчук, але калі яго запрасілі паглядзець карціны, ён адмовіўся.

Выстава адкрылася з нагоды Дня Волі і на ёй прадстаўленыя карціны вядомых беларускіх мастакоў Аляксея Марачкіна, Алеся Пушкіна, Алеся Цыркунова, Рыгора Сітніцы і іншых. Самую вялікую цікавасць выклікаюць забароненая карціна Аляксея Марачкіна “Сляза Міндаўга” і серыя палотнаў Алеся Пушкіна "Рукі беларусаў". Мастакі не выключаюць, што выстава можа быць забароненая.

Міністр культуры прыйшоў у палац разам са сваімі намеснікамі. Суправаджаў дэлегацыю дырэктар палаца. Калі Матвяйчук пабачыў журналістаў, ён пачаў пытацца, чаго яны сюды прыйшлі і паспрабаваў забараніць здымаць сябе на фатакамеру. Тады да міністра падышоў мастак і кіраўнік суполкі “Пагоня” Аляксей Марачкін. Мастак шчыра вітаў міністра і запрасіў яго паглядзець карціны. У адказ Матвяйчук сказаў, што ён зайшоў у палац, каб абмеркаваць дэталі рамонту будынку. Паглядзець выставу ён адмовіўся. Пастаяўшы хвілінаў пяць, дэлегацыя ўвогуле сыйшла.

“З самай раніцы была інфармацыя, што ў 15.30 на выставу павінен прыйсць старшыня Менгарвыканкама Паўлаў і ягоная чэлядзь. Як бачыце, у 15.30 з’явіўся міністр пад выглядам рамонту... Магчыма чыноўнікі будуць вырашаць і гэтае пытанне. Але цікавая сітуацыя. Калі я сказаў, што я рады іх бачыць і запрасіў аглядзець выставу, яны адмовіліся. Калі міністра культуры Матвяйчука гэта не зацікавіла, то мяне ўвогуле здзіўляе... Што гэта за міністр культуры?”, -- сказаў прэс-цэнтру Хартыі’97 Аляксей Марачкін.

Палатно Аляксея Марачкіна “Сьляза Міндоўга”

Фрагмэнт кампазыцыі Алеся Пушкіна

Фота ByMedia.net