Кадыраў афіцыйна стаў прэзідэнтам Чачэніі :: Хартыя'97 :: Навiны

Рамзан Кадыраў у сваёй загараднай рэзідэнцыі ў Гудэрмесе сёння, 5 красавіка, прыняў прысягу перад дэпутатамі рэспубліканскага парламента і ўступіў на пасаду прэзідэнта Чачэніі. Цырымонія праходзіць у спецыяльна пабудаванай шкляной зале плошчай шэсць тысяч квадратных метраў, якая абшытая знутры бела-сіняй тканінай.

Інаўгурацыя пачалася ў 12:15 па мясцовым часе. Вакол трыбуны, з якой Кадыраў зачытваў тэкст прысягі, была збудаваная дэкарацыя з гор і веж, паведамляе Корреспондент.net.

Кадыраў прынёс прысягу на канстытуцыі рэспублікі, пасля чаго атрымаў ад паўнамоцнага прадстаўніка прэзідэнта Расеі ў ПФА Дзмітрыя Казака пасведчанне і прэзідэнцкі штандар.

Для ўдзелу ва ўрачыстасцях у Чачэнію запрошаныя больш як 1500 госцяў і 500 афіцыйных асоб. Асвятляць цырымонію будуць каля 200 расейскіх і 70 замежных журналістаў.

Запрошаныя – лідэры ўсіх сумежных рэгіёнаў, у тым ліку непрызнаных рэспублік Абхазіі і Паўднёвай Асеціі, вышэйшыя службовыя асобы Расеі, Казахстана і Азербайджана, прадстаўнікі Патрыярхіі і Духоўнага ўпраўлення мусульман, амбасадары краін Еўропы і Блізкага Усходу, паведамляе "Інтэрфакс". Па словах сябраў аргкамітэта, Грозненскі аэрапорт з серады працаваў у рэжыме, небывалым за апошнія 15 гадоў.

У Маскве каля будынка прадстаўніцтва Чачэніі на Новым Арбаце праходзіць акцыя, прымеркаваная да інаўгурацыі Рамзана Кадырава. У ёй удзельнічаюць каля 20 чалавек, з якіх 10 – прыхільнікі Міхаіла Касьянава, 10 – прадстаўнікі нацыяналістычных арганізацый. Лідэр ДПНІ стаіць убаку і не прымае ўдзелу ў акцыі. Пры гэтым удзел нацыяналістаў у мітынгу заяўлены не быў.

Актывісты трымаюць у руках на тычцы спартовы гарнітур, а таксама расцяжкі з лозунгам "Акадэмік Кадыраў выратуе расейскую навуку". Поруч будынка прадстаўніцтва Чачэніі таксама стаіць аўтобус з міліцыянтамі, аднак яны пакуль нічога не робяць. Удзельнікі акцыі іранічна кажуць, што тэрыторыя Чачэніі не ў поўнай меры адпавядае маштабам асобы Кадырава, таму ён годны большай прасторы для дзейнасці і яго можна высунуць у прэзідэнты Расеі.