Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
У Эстоніі зацверджаны новы склад урада 11:13, 05/04/2007
Прэзідэнт Эстоніі Тоомас Хендрык Ільвес зацвердзіў склад новага кабінета міністраў, які ўзначаліў цяперашні прэм`ер, лідэр Рэфармісцкай партыі Андрус Ансіп. Як паведаміла канцылярыя прэзідэнта, Ансіп, які атрымаў ад парламента паўнамоцтва сфармаваць новы ўрад, прадставіў склад кабінета міністраў эстонскаму лідэру ў сераду, 4 красавіка.
Права-ліберальная Рэфармісцкая партыя, як пераможца парламенцкіх выбараў, прапанавала ўвайсці ў кіроўную кааліцыю нацыяналістычнай аб`яднанай партыі Саюз Бацькаўшчыны і Рэспубліка (IRL) і Сацыял-дэмакратычнай партыі.
Паводле кааліцыйнай дамовы, на чале ўрада застаецца цяперашні прэм`ер, лідэр Рэфармісцкай партыі Андрус Ансіп. Рэфармістам будуць належаць партфелі кіраўнікоў Міністэрстваў замежных спраў, юстыцыі, культуры, навакольнага асяроддзя і сацыяльных спраў. Акрамя таго, ім належыць месца віцэ-спікера парламента.
IRL атрымоўвае пасады міністраў абароны, адукацыі і навукі, сельскай гаспадаркі, эканомікі, грамадскага ўпраўлення і месца спікера парламента.
Сацыял-дэмакраты ўзначаляць Міністэрствы фінансаў, унутраных спраў і народанасельніцтва.
З міністраў мінулага ўрада на сваіх пасадах застаюцца "рэфармісты" кіраўнік МЗС Урмас Паэт і міністр юстыцыі Рэйн Ланг.
Новы ўрад Эстоніі ўступіць на пасаду ў чацвер, 5 красавіка. На ранішнім паседжанні парламента сябры ўрада прынясуць службовую прысягу, пасля чаго міністры і кіраўнік урада афіцыйна ўступяць у пасаду.
