Сяргей Глазьеў: Беларусь можа сарвацца ў крызісную спіраль :: Хартыя'97 :: Навiны

Беларусь можа сарвацца ў крызісную спіраль зніжэння вытворчасці. Пра гэта ў інтэрв’ю журналу “Союзное государство” заявіў дэпутат Дзярждумы Расеі, навуковы кіраўнік Нацыянальнага інстытуту развіцця Сяргей Глазьеў. На пытанне, што адбудзецца пасля падвышэння “Газпромам” цаны на газ, Сяргей Глазьеў адказаў наступнае:

– Гэта пытанне цаны, з аднаго боку, і эфектыўнасці вытворчасці, з іншага боку. На сённяшні дзень узровень энергаёмістасці расейскай прамысловасці, савецкай прамысловасці, прыкладна ў чатыры разы вышэйшы, чым у Еўропе. Нават калі выказаць здагадку, што ў Беларусі эфектыўнасць энергаспажывання ў 2 разы вышэйшая, чым цяпер у Расеі, то ўсё роўна энергаёмістасць беларускай прамысловасці і машынабудавання, як мінімум, удвая вышэйшая за еўрапейскую. Гэта азначае, што беларусы могуць сабе дазволіць плаціць за газ удвая танней, чым у Еўропе. Уласна кажучы, такая цана сёння і ўсталяваная. Гэта значыць, беларускую эканоміку пасадзілі на галодную пайку, ёй не даюць пашырацца. Я думаю, што калі цана на газ не будзе далей расці, то беларускае машынабудаванне здолее адаптавацца і далей ісці наперад. Але зразумела, што яны страцілі сёння значную частку прыбыткаў, таму што змушаныя ў тры разы больш плаціць за газ. Следствам гэтага стане рэзкае падзенне канкурэнтаздольнасці беларускіх тавараў у Расеі, а ўсё-ткі Расея для Беларусі ключавы партнёр і галоўны партнёр. Як следства, звужэнне, паніжэнне маштабаў вытворчасці, з прычыны страты расейскага рынку, а значыць павелічэнне выдаткаў і далейшае паніжэнне канкурэнтаздольнасці. Гэта значыць Беларусь можа сарвацца ў крызісную спіраль паніжэння вытворчасці, росту выдаткаў і гэтак далей. На жаль, расейскі ўрад гэтым нават не цікавіцца.