Клімаў адмовіўся даваць паказаньні ў сваёй справе :: Хартыя'97 :: Навiны

Пра гэта «Радыё Свабода» паведаміла адвакат Кацярына Дудко, якая аказвала апазіцыйнаму лідэру Андрэю Клімаву юрыдычныя паслугі, калі яму выставілі абвінавачаньне. Адвакат паведаміла, што падчас азнаямленьня з абвінавачаньнем “Клімаў трымаўся спакойна і заявіў, што ён адмаўляецца даваць паказаньні і супрацоўнічаць са сьледзтвам”. Ад камэнтару адносна выстаўленага Клімаву абвінавачаньня Кацярына Дудко ўстрымалася.

Нагадаем, былы дэпутат Андрэй Клімаў быў затрыманы 3 красавіка паводле абвінавачаньня ў закліках да зьвяржэньня дзяржаўнага ладу.

Сьледчы пракуратуры Менска Анатоль Гадун не паведаміў пра ўмовы, у якіх зараз знаходзіцца былы дэпутат Андрэй Клімаў. Адмовіўся адказваць на гэтае пытаньне і дзяжурны менскага сьледчага ізалятара на вуліцы Валадарскага, дзе трымаюць Андрэя Клімава.

Раней Андрэй Клімаў правёў у турме 4 гады па абвінавачваньні ў эканамічных злачынствах, але сам палітык лічыць, што ён быў асуджаны за актыўны ўдзел у кампаніі імпічмэнту прэзідэнту Лукашэнке. У 2005 годзе суд Цэнтральнага раёну Менску пакараў Клімава 1,5 гадамі абмежаваньня волі за арганізацыю вулічнай акцыі 25 сакавіка. У сьнежні 2006 году ён выйшаў на свабоду.

Увогуле Клімаў правёў за кратамі 5,5 гадолў. Палітык быў прызнаны Вязьнем Сумленьня.