Праваабарончы цэнтр «Вясна» пра беззаконьне ў Полацку :: Хартыя'97 :: Навiны

Праваабаронцы пачалі каментаваць падзеі, якія адбыліся ў Полацку 4 красавіка, калі супрацоўнікі спэцслужбаў захапілі прахадную ААТ «Полацк-Шкловалакно».

Людзі ў масках каля гадзіны ўтрымлівалі ў якасьці закладнікаў усіх, хто туды заходзіў. Каля пятнаццаці невядомых у масках з аўтаматамі прыкладна аб адзінаццатай раніцы нечакана ўварваліся на прахадную прадпрыемства і заблякавалі яе. Людзей, што апынуліся там, паставілі каля вяртушкі тварам да сьценкі. Пасьля пачалі хвастаць дубінкамі, каб прымусіць людзей расставіць ногі шырэй, а рукі выцягнуць угару і ўбокі ўздоўж сьценцы.

Людзей вызвалілі толькі пасьля таго, як на супольным беларуска італьянскім прадпрыемстве, якое месьціцца за прахадной ААТ «Полацк-Шкловалакно», сканфіскавалі нейкую дакумэнтацыю. Пасьля гэтага ў джып пасадзілі дырэктара СП і ягонага намесьніка і павезьлі ў Менск.

Адразу па вызваленьні практычна ўсе пацярпелыя напісалі заявы з скаргамі ўва ўсе інстанцыі: генэральнаму дырэктару, генэральнаму пракурору і ў адміністрацыю прэзыдэнта.

Праваабарончы цэнтр «Вясна» адзначае, што падобныя беззаконьні адбываюцца на фоне нядаўніх выказваньняў Лукашэнкі пра тое, што “правы і свабоды грамадзян, вызначаныя заканадаўствам, павінны быць безумоўна забяспечаны. Гэта абавязак усіх дзяржаўных органаў, уключаючы судовыя інстанцыі”. Што адбываецца на самой справе – бачна ўсім.