У Магілёве судзяць міліцыю :: Хартыя'97 :: Навiны

У Магілёве 5 красавіка пачаўся суд над супрацоўнікамі міліцыі, якія ў снежні затрымалі групу грамадскіх актывістаў.

5 красавіка былі дапытаныя сведкі з боку тых, хто падаваў скаргі на пазапраўныя дзеянні прадстаўнікоў праваахоўных структур. У якасці заяўнікаў выступілі юрыст Аляксандр Каралёў і грамадскія актывісты Ірына Качарава і Аляксей Паўлоўскі. Яны патрабуюць прызнаць дзеянні супрацоўнікаў міліцыі пазапраўнымі і кампенсаваць маральную шкоду, паведамляе БелаПАН.

16 снежня 2006 года на дарозе на Менск у некалькіх кіламетрах ад райцэнтра Бялынічы было спыненае маршрутнае таксі, у якім знаходзіліся 13 чалавек. Яны накіроўваліся на ўстаноўчую канферэнцыю Саюза левых партый у Чарнігаў (Украіна). Супрацоўнікі ДАІ прапанавалі вярнуцца ў Магілёў для праверкі дакументаў на мікрааўтобус. Вяртаючыся ў абласны цэнтр, пасажыры маршрутнага таксі вырашылі выйсці на адным з прыпынкаў горада, каб самастойна дабрацца да чыгуначнага вакзалу і ў Жлобіне сесці на цягнік да Чарнігава. Калі пасажыры выходзілі з мікрааўтобуса, да прыпынку пад`ехала яшчэ адна машына ДАІ, і дэлегатаў, высунутых на канферэнцыю, супрацоўнікі міліцыі пачалі запіхваць у мікрааўтобус з выкарыстаннем фізічнай сілы. Затрыманым было сказанае, што яны павінны быць дастаўленыя ў РАУС для праверкі дакументаў. Сярод тых, хто сілай быў пасаджаны ў мікрааўтобус, былі Аляксандр Каралўў, Аляксей Паўлоўскі, Ірына Качарава і Юрый Дарашчэнка. Пасведчанні кандыдатаў у дэпутаты мясцовых саветаў на супрацоўнікаў ДАІ не падзейнічалі.

6 красавіка будуць заслуханыя супрацоўнікі міліцыі і сведкі з іх боку.