«Малады Фронт» падае дакументы на рэгістрацыю :: Хартыя'97 :: Навiны

Крымінальная справа ў дачыненні пяці актывістаў “Маладога Фронта” перададзеная ў суд Савецкага раёна Менска. Пра гэта паведаміў адзін з фігурантаў справы Барыс Гарэцкі. Пры гэтым ён адзначыў, што моладзевыя актывісты не спыняюць сваёй дзейнасці. “Сёння мы будзем віншаваць вядомых людзей Беларусі з мінулым Вялікаднём. Цягам тыдня павінна вырашыцца пытанне з падрыхтоўкай дакументаў у Міністэрства юстыцыі аб рэгістрацыі нашай арганізацыі. Я думаю, што да канца тыдня мы гэтыя дакументы ў Мінюст пададзім. Увогуле, працуем у звычайным рэжыме”, – сказаў Б.Гарэцкі.

Нагадаем, 27 актывістаў арганізацыі “Малады Фронт” былі затрыманыя ўвечары 4 лютага на прыватнай кватэры ў Менску падчас паседжання цэнтральнай рады арганізацыі. Затрыманне праводзілі супрацоўнікі палка міліцыі спецыяльнага прызначэння. Маладзёнаў даставілі ва УУС Савецкага раёна сталіцы. Пасля складання пратаколаў усе, акрамя Змітра Хведарука і Алега Корбана, былі вызваленыя. Актывісты тры дні правялі ў следчым ізалятары КДБ і былі прызнаныя падазраванымі ў здзяйсненні злачынства, прадугледжанага арт. 193-1 Крымінальнага кодэкса (дзейнасць ад імя незарэгістраванай арганізацыі). Санкцыі гэтага артыкула: штраф, або арышт на тэрмін да шасці месяцаў, або пазбаўленне свабоды на тэрмін да двух гадоў. Пасля падазраванымі былі прызнаныя і Наста Палажанка, Барыс Гарэцкі, Аляксей Янушэўскі. У выніку следчых дзеянняў іх статус быў зменены – усе пяць маладых актывістаў сталі абвінавачванымі ў гэтым злачынстве.

Варта адзначыць, што па тым самым артыкуле за ўдзел у той самай арганізацыі 1 лістапада 2006 года лідэр “Маладога Фронту” Зміцер Дашкевіч быў асуджаны на адзін год і шэсць месяцаў пазбаўлення свабоды з адбываннем пакарання ў калоніі агульнага рэжыму.