«Палатнікі» разгледзяць папраўкі ў законы аб партыях і грамадскіх аб’яднаннях :: Хартыя'97 :: Навiны

Папраўкі ў некаторыя законы па пытаннях дзейнасці палітычных партый і грамадскіх аб’яднанняў разгледзяць парламентары 11 красавіка падчас сесій. Дакумент плануецца абмеркаваць адразу ў двух чытаннях, паведамілі карэспандэнту БелТА у прэс-службе “палаты прадстаўнікоў”.

Як распавёў карэспандэнту БелТА сябра Пастаяннай камісіі па правах чалавека, нацыянальных стасунках і сродках масавай інфармацыі Аляксандр Свірыд, у назвах грамадскіх аб`яднанняў Беларусі плануецца выключыць слова "акадэмія". Суразмоўца паведаміў, што ў Беларусі сёння налічваецца больш як 20 такіх грамадскіх аб`яднанняў. Напрыклад, Акадэмія жыллёва-камунальнай гаспадаркі, Беларуская акадэмія грамадскіх навук, Акадэмія метралогіі, Беларуская акадэмія палітычных навук і іншыя. Пад гэтай шыльдай грамадскія аб`яднанні мелі права прымаць іспыты і выдаваць дыпломы кандыдатаў навук. Але згодна з указам прэзідэнта, падпісаным у чэрвені 2006 года, права прысваення навукоўцаў і акадэмічных званняў даецца толькі прэзідыуму вышэйшай атэстацыйнай камісіі. Таму і была распрацаваная дадзеная папраўка, растлумачыў дэпутат.

Паводле зменаў і дадаткаў у закон аб палітычных партыях, выключаецца паняцце "Рэспубліканская камісія па рэгістрацыі і перарэгістрацыі грамадскіх аб`яднанняў". Такая камісія папярэдне разглядала пытанні рэгістрацыі палітычных партый і грамадскіх аб`яднанняў, а потым перадавала матэрыялы ў Мінюст, дзе прымалася канчатковае рашэнне. Цяпер дадзенымі пытаннямі будзе займацца адразу Міністэрства юстыцыі.

У той самы дзень “палата прадстаўнікоў” плануе абмеркаваць папраўкі ў законы аб спажывецкай кааперацыі, аб аб`ектах права прамысловай уласнасці, аб дзяржаўных узнагародах, разгледзець змены і дадаткі ў Грамадзянскі кодэкс па пытаннях усынаўлення дзяцей.