Украіна апярэджвае Расею па ўступленні ў СГА :: Хартыя'97 :: Навiны

Украіна знаходзіцца на больш прасунутай стадыі па ўступленні ў СГА за Расею. Такое меркаванне выказаў дырэктар дэпартаменту гандлёвых перамоваў МЭРГ РФ Максім Мядзведкаў падчас выступу на ІІ Міжнародным кангрэсе “Расея ў СГА: надзеі і стратэгічныя магчымасці”, паведамляе “РБК-Украіна”.

"У Жэневе ходзяць чуткі, што Украіна можа стаць сябрам СГА да канца лета 2007 г. Мы гэтаму толькі рады, бо Украіна – наш буйны гандлёвы партнёр, і чым хутчэй яна стане кіравацца гандлёвай палітыкай СГА, тым лепш", – адзначыў М.Мядзведкаў. Адказваючы на пытанне журналістаў, ці выявіць Украіна ў гэтым выпадку жаданне ўступіць у двухбаковыя з Расеяй перамовы па ўступе РФ у СГА, М.Мядзведкаў растлумачыў, што "тэарэтычна такая магчымасць існуе", і дадаў: "Нашы ўкраінскія калегі неаднаразова казалі пра тое, што яны не маюць намеру ўступаць у перамовы з Расеяй па СГА або ставіць якія-небудзь іншыя перашкоды для ўступлення Расеі ў Сусветную гандлёвую арганізацыю".

Тым часам Расея спадзяецца завяршыць асноўную частку шматбаковых перамоваў па ўступленні ў СГА у першым паўгоддзі 2007 г. Пра гэта падчас выступу на кангрэсе, паведаміў кіраўнік МЭРГ РФ Герман Грэф. Па словах міністра, цяпер праходзіць актыўная стадыя перамоваў, падчас якой абмяркоўваецца шэраг ключавых пытанняў. У прыватнасці, гаворка ідзе пра прывядзенне расейскага заканадаўства ў адпаведнасць з нормамі СГА. Г.Грэф распавёў, што найперш абмяркоўваецца заканадаўства ў сферы тэхнічнага рэгулявання, інтэлектуальнай уласнасці, ужывання санітарных і фітасанітарных мераў. У якасці прыкладу міністр прывёў законапраект аб тэхнічным рэгуляванні, які быў вернуты на паўторны разгляд у Дзярждуму ў сувязі з шэрагам заўваг міжнародных экспертаў. "У пятніцу (6 красавіка) Дзярждума прыняла тыя папраўкі, якія былі ўзгодненыя з міжнароднымі экспертамі, і на сёння мы маем законапраект, які ў поўным аб`ёме адпавядае заканадаўству СГА", – сказаў Г.Грэф. Таксама кіраўнік МЭРГ распавёў, што перамовы па СГА з Еўразвязам знаходзяцца "на прасунутай стадыі". "Засталося некалькі ключавых тэм, спадзяюся, што цягам найбліжэйшага месяца мы здолеем знайсці іх развязанне", – падкрэсліў ён.

Між іншым, працягваюцца двухбаковыя перамовы Расеі з Камбоджай і В`етнамам. Па прагнозах Г.Грэфа, яны павінны завяршыцца ў красавіку–траўні. Што ж тычыцца Грузіі, якая адклікала свой подпіс пад пагадненнем з Расеяй, то з ёй цяпер вядуцца тэхнічныя кансультацыі. Бакі спрабуюць знайсці кампраміс, які задавальняў бы абодва бакі. Апроч 3-х вышэйназваных краін, Расеі таксама неабходна скласці двухбаковае пагадненне з Гватэмалай. Да сёння РФ завяршыла перамовы з 58 дзяржавамі.

Па правілах СГА, уступіць у арганізацыю можа толькі тая краіна, супраць сяброўства якой не пярэчыць ніводная з краін-удзельнікаў. Украіне для ўступлення ў СГА засталося ўзгадніць толькі пытанні з Кыргызтанам. Паміж Украінай і Кіргізіяй спрэчным застаецца пытанне запазычанасці прадпрыемстваў дзвюх краін, якая ўтварылася пасля распаду СССР. Украіна не прызнае гэты доўг дзяржаўным, таму не мае намеру яго вяртаць. У канцы сакавіка Мінгандль ЗША заклікала Украіну і РФ хутчэй уступіць у СГА. "ЗША склалі двухбаковыя пагадненні аб ўмовах уступлення ў СГА з абедзвюма краінамі. Кіеву і Маскве неабходна атрымаць канчатковую згоду ўсіх сяброў СГА для ўсталявання міжнародных нарматываў гандлю", – сказаў міністр гандлю ЗША Карлас Гуцьерас. Па яго словах, РФ ужо гатовая да ўступлення ў СГА і да канкурэнцыі з іншымі краінамі-сябрамі гэтай арганізацыі. "Тое, чаго дасягнула Расея за 17 гадоў, шматлікія краіны не здолелі дасягнуць і за 50", – сказаў ён, выступаючы з лекцыяй у Вышэйшай школе эканомікі ў Маскве 2 красавіка.

Перамовы па ўступленні Расеі ў СГА цягнуцца ўжо 13 гадоў, а Украіны – больш за 12. Гэтымі днямі прэм`ер-міністр Украіны Віктар Януковіч запэўніў, што унутрыпалітычныя падзеі ва Украіне ніяк не адаб`юцца на яе знешнепалітычных абавязальніцтвах. Ён таксама падкрэсліў, што яго ўрад пры ўсялякіх абставінах забяспечыць захаванне правоў замежных інвестараў – як тых, што ўжо ўклалі сродкі, так і тых, хто гэта толькі збіраецца зрабіць. Таксама, па словах прэм`ера, на наступным тыдні Кабмін прадставіць стратэгію развіцця Украіны. Ён удакладніў, што яна прадугледжвае правядзенне структурных эканамічных і адміністрацыйных рэформ.

У СГА уваходзяць 149 краін, на якія прыходзіцца 95% сусветнага гандлёвага абарачэння. Усе суседзі Украіны (акрамя Расеі і Беларусі) ужо з`яўляюцца сябрамі СГА. На краіны СГА даводзіцца каля 70% украінскага экспарту.