Брытанцы пішуць лісты ў абарону Змітра Дашкевіча :: Хартыя'97 :: Навiны

Гэтымі днямі брытанцы пачалі пісаць больш паштовак у Беларусь . Найбольш папулярныя адрасаты - Аляксандар Лукашэнка ды міністар унутраных справаў Уладзімір Навумаў. На ўсіх гэтых паштоўках – партрэт беларускага моладзевага актывіста Зьмітра Дашкевіча ды заклік неадкладна вызваліць яго з-за кратаў.

Паштоўка на адрас міністра Навумава выглядае як папяровы жураўлік-арыгамі, другая – на адрас Лукашэнкі – мае чатыры старонкі. На ёй напісаныя наступныя словы:

«Спадар прэзыдэнт, я прадстаўнік Аб`яднанага Каралеўства, хачу выказаць сваю заклапочанасьць лёсам вязьня сумленьня Зьмітра Дашкевіча, які пакараны толькі за тое, што мірна адстойваў сваё права на свабоду меркаваньняў і сходаў. Я заклікаю Вас зрабіць ўсё, што ў Вашай ўладзе, каб спыніць перасьлед грамадзянаў, якія напрост ці ўскосна абараняюць правы чалавека».

Паштовую акцыю ў рамках праекту “Make Some Noise” (“Зрабі крыху шуму”) праводзіць праваабарончая арганізацыя “Міжнародная амністыя”.

«Эўрапейцы мусяць адкрыць вочы на сытуацыю ў Беларусі - краіне, дзе апазыцыя сустракае гвалт з боку рэжыму, а грамадзянскіх актывістаў арыштоўваюць», -- паведамілі “Радыё Свабода” ў “Міжнароднай амністыі”.

Сярод удзельнікаў кампаніі “Make Some Noise” вядомыя ў сьвеце гурты і выканаўцы. Пару год таму гурт The Cure ды іншыя выканаўцы атрымалі права ад ўдавы Джона Ленана Ёкі Она запісаць трэкі зь песьнямі яе мужа. Акцыя была прысьвечаная вызваленьню беларускага прафэсара, палітвязьня Юрыя Бандажэўскага ды ўсіх палітвязьняў у сьвеце. Сёньня кампанія “Make Some Noise” нагадвае пра іншых несправядліва пакараных у Беларусі.