Праваабаронцы патрабуюць вызваліць Андрэя Клімава :: Хартыя'97 :: Навiны

Міжнародная Хельсінкская федэрацыя (МХФ) выказала «глыбокую занепакоенасць» лёсам палітвязня Андрэя Клімава. Пра гэта гаворыцца ў заяве, разгледжанай 10 красавіка прэс-службай МХФ. Праваабаронцы адзначаюць, што Андрэй Клімаў з’яўляецца першым у Беларусі, каго арыштавалі па абвінавачванні ў парушэнні артыкула 361 Крымінальнага кодэкса. «Гэта паказчык таго, як закон можа быць скарыстаны для парушэння свабоды слова», – адзначаецца ў заяве МХФ.

У заяве таксама выказваецца занепакоенасць праваабарончых арганізацый з нагоды магчымасці выкарыстання Крымінальнага кодэкса Беларусі для прад`яўлення абвінавачванняў грамадзянам на падставе матэрыялаў, якія з`яўляюцца ў Інтэрнэце.

Нагадаем, А.Клімаў быў арыштаваны ў Менску 3 красавіка. Яму інкрымінуецца злачынства, прадугледжанае часткай 3 артыкула 361 Крымінальнага кодэкса Беларусі (заклікі да звяржэння або змены канстытуцыйнага ладу Рэспублікі Беларусь <...>, здзейсненыя з выкарыстаннем сродкаў масавай інфармацыі). Клімаву пагражае пазбаўленне свабоды на тэрмін да пяці гадоў.

Раней Андрэй Клімаў правёў у турме 4 гады па абвінавачванні ў эканамічных злачынствах, але сам палітык лічыць, што ён быў асуджаны за актыўны ўдзел у кампаніі імпічменту прэзідэнту Лукашэнка. У 2005 годзе суд Цэнтральнага раёна Менска прысудзіў Клімава да 1,5 гадоў абмежавання волі за арганізацыю вулічнай акцыі 25 сакавіка. У снежні 2006 года ён выйшаў на свабоду.

У цэлым Клімаў правёў за кратамі 5,5 гадоў. Палітык быў прызнаны Вязнем Сумлення.