«Палатка» рыхтуе адмену ўсіх ільгот для ліквідатараў аварыі ЧАЭС :: Хартыя'97 :: Навiны

Ініцыятар стварэння рэспубліканскага грамадскага аб’яднання “Ліквідатар” Уладзімір Ваўчанін паведаміў 11 красавіка, што яму стала вядома пра падрыхтоўку ў “палаце прадстаўнікоў” закона, які адмяняе ўсе льготы беларусам-ліквідатарам аварыі на ЧАЭС. Пра гэта яму паведаміў старшыня камісіі па праблемах чарнобыльскай катастрофы і экалогіі “палаты прадстаўнікоў” РБ Віталь Кулік. "Пры прыняцці гэтага законапраекта будуць цалкам пазбаўленыя льгот грамадзяне, якія ў 1986–1987 гады удзельнічалі ў ліквідацыі наступстваў Чарнобыля", – паведаміў Уладзімір Ваўчанін.

Законапраектам прадугледжваецца адмена штогадовага бясплатнага санаторна-курортнага лячэння па накіраванні медкамісіі, пенсійнага забеспячэння пры дасягненні 55-гадовага ўзросту, штогадовага дадатковага аплачанага двухтыднёвага водпуску, бясплатных лекаў, паведамляе БелаПАН.

Уладзімір Ваўчанін прапанаваў дэпутату і кіраўніку камісіі па праблемах чарнобыльскай катастрофы правесці парламенцкія слуханні па дадзеным законапраекце.

"Калі ж наша меркаванне не будзе пачутым, мы пакідаем за сабою права звярнуцца да дзяржсакратара Саюзнай дзяржавы Паўла Барадзіна і ў міжнародныя арганізацыі", – паабяцаў ініцыятар стварэння рэспубліканскага грамадскага аб`яднання "Ліквідатар".

Раней “Тэлеграф” паведаміў, што беларусы-ліквідатары аварыі на Чарнобыльскай АЭС накіравалі ў лютым прэзідэнту Украіны ліст, у якім просяць Віктара Юшчанку пераканаць Аляксандра Лукашэнку вярнуць ім ільготы. Беларускія ліквідатары паведамілі ў лісце, што паводле ўжо прынятых зменаў закона "Аб сацыяльнай абароне грамадзянаў, пацярпелых ад катастрофы на ЧАЭС", яны пазбаўленыя дзяржпадтрымкі.

Таксама ў лісце ліквідатары паведамілі Віктару Юшчанка, што ў Беларусі вядзецца палітыка, на іх думку, замоўчвання рэальных наступстваў для людзей аварыі на ЧАЭС. "Звычайнай практыкай стала непрызнанне сувязі паміж захворваннямі ліквідатараў і фактам іх знаходжання ў зоне радыеактыўнага забруджвання, пры гэтым ігнаруюцца аб`ектыўныя навуковыя дадзеныя, якія адназначна пацвярджаюць наяўнасць гэтай сувязі", – гаворыцца ў лісце.